नितेश कुमाराक भांगरा पदक

भांगरभूंय | प्रतिनिधी

भारताक हांगा चालू आशिल्ले पॅरालिम्पिकीचो पांचवो दीस येसस्वी थारलो. दादल्यांच्या बॅडमिंटन गटांत भांगरा पदक जिखल्या उपरांत बायलांच्या गटांत दोन आयलीं.

दादल्यांच्या बॅडमिंटन गटांत नितेश कुमारान एसएल3 श्रेणींत भांगरा पदक जिखलें. पॅरीस पॅरालिम्पिकांत भारतान मेळयिल्लें हें दुसरें भांगरा पदक थारलें. नितेशा पयलीं नेमबाजींत अवनी लेखरान भांगरा पदक जिखिल्लें.

मजगतींत काल नितेशा पयलीं डिस्कस थ्रो खेळांत योगेश कथुनियान रुप्या पदक जिखिल्लें.

भारतान अजून मेरेन 11 पदकां जिखल्यात. दोन भांगरा पदकां सयत चार रुप्या पदकां आनी 5 कांश्या पदक जिखल्यात.

नितेशान फायनलींत ग्रेट ब्रिटनाच्या डॅनिएल बेथेलाक हारयलो. अखेर नेरेन उमळशीक वाडोवपी थारिल्ले मॅचींत नितेशान 1 वर आनी 20 मिनटांनी 21-14, 18-21 आनी 23-21 अशा फरकान जैत जोडलें.

पयली गेम चुरशीची थारली. दोगूय खेळगड्यांनी एकामेकाक खर आव्हान दिलें. पूण, पयले गेमीच्या मध्यांतरा उपरांत नितेशान आपल्या खेळाची पातळी वाडयली आनी पयली गेम जिखली.

दुसरे गेमींत लेगीत पयलेच गेमी भशेन चित्र आशिल्लें. नितेशान आघाडी घेतिल्ली. पूण, उपरांत बेथेलान पुनरागमन करीत बरोबरी सादली. ताणें दुसरी गेम जिखून मॅच तिसरे आनी निर्णायक गेमी मेरेन व्हेली.

तिसरी गेम लेगीत उमळशीक वाडोवपी थारली. दोनूय खेळगडे हार मानपाक तयार नाशिल्ले. बरोबरी 21-21 मेरेन चलली. पूण, नितेशान अखेरचे दोन गूण जिखून भांगरा पदक जोडलें.

थुलासिमाथी, मनिषा पर्जळ्ळीं

भारता खातीर बॅडमिंटनांत कालचो दीस उत्कृश्ट थारलो. सकाळीं नितेशान एकोड्या गटांत भांगरा पदक जिखल्या उपरांत रातीं कडेन थुलासिमाथी मुरुगेसन आनी मनिषा रामदास हिणें बायलांच्या एकोड्या एसयू 5 गटांत वळेरेन रुपें आनी कांशें जिखलें.

पॅरा बॅडमिंटनांत बायलांच्या गटांत हें पयलेंच पदक थारलें. थुलासिमाथीक भांगरा पदकाचे लडतींत चीनाचे यांग क्वियू झिआ कडल्यान 21-17 आनी 21-10 अशी हार घेवची पडली. ताका लागून थिलासिमाथीक रुप्या पदकाचेर समाधान मानचें पडलें. पॅरालिम्पिकांतले बॅडमिंटन प्रकारांत बायल खेळगडयेन भारता खातीर जिखिल्लें पयलेंच पदक थारलें. ते उपरांत कांश्या पदका खातीर जाल्ले मॅचींत मनिषान डॅन्मार्काचे कॅथरीन रोसेन्ग्रेन हिका 21-12 आनी 21-8 अशा सरळ गेमींनी हारयली.