भांगरभूंय | प्रतिनिधी
गोंयचो इंटरनॅशनल मास्टर (आयएम) नितीश बेलुरकारान बेळगांवां जाल्ले सतीश अण्णा अखील भारतीय उक्ते रॅपीड बुद्दीबळ सर्तींत वस्तादपण जोडलें. नितीश एकूय मॅच हारूंक ना. ताणें आठ जैतां आनी एक बरोबरी सत णव फेरयांनी साडे आठ गुणांची कमाय केली.
नितिशान गोंयचो फिडे मास्टर ऋत्विज परब, हैदराबादाचो कॅण्डिडेट मास्टर कार्तिक साई ह्या मुखेल खेळगड्यांक हारयले. जाल्यार कोल्हापूरच्या इंटरनॅशनल मास्टर सम्मेद शेटे हाका बरोबरींत आडायलो.
चेन्नयचो आर शैलेश आठ गुणां सयत उप वस्ताद थारलो. जाल्यार ऋत्विज परब तिसरे सुवातेर आयलो. ताचे साडेसात गूण जाले. गोंयचे हेर खेळगड्यां मदीं मंदार लाड आनी ऋषिकेश परब हांकां वळेरेन णववी आनी 18वी सुवात फावो जाली. तशेंच अस्मित रे ह्या गोंयच्या खेळगड्याक 14 वर्सां पिराये सकयल्या गटांत पयली सुवात फावो जाली, ह्याच गटांत मयुरेश देसायाक तिसरी, 16 वर्सां पिराये सकयल्या गटांत शौर्य पेडणेंकाराक चवथी, आठ वर्सां पिराये सकयल्या गटांत श्रेष्ठ घोणसेकाराक पांचवी, जाल्यार 10 वर्सां पिराये सकयल्या गटांत अथर्व शिरोडकाराक धावी सुवात फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
