भांगरभूंय | प्रतिनिधी
वॉशिंग्टन सुंदरा वांगडची शेंकड्याची भागिदारी फुटली त्या वेळार नितीश कुमार रेड्डी 97 धांवड्यांचेर आशिल्लो. आतां फकत दोनूच विकेटी बाकी आशिल्ल्यो आनी बॅटिंगेक फास्ट बॉलर जसप्रीत बुमरा आयलो. फुडले ओव्हरींत नितीश कुमार रेड्डी कडेन स्ट्रायक आशिल्ली. ताणें स्कॉट बोलॅण्डाचे ओव्हरींत एकोडी धांवडी घेवपाची संद आशिल्ली. पूण, ताणें ती घेवंक ना. हाचें फाटलें मुखार कारण म्हणल्यार ताका बुमराचे बॅटिंगेचेर विस्वास नाशिल्लो. घडये उरिल्ल्यो दोनूय विकेटी पडल्यो जाल्यार आपल्याक शेंकडो चुकतलो अशें नितीश रेड्डी दिसला आसतलें. पूण, फुडले ओव्हरीच्या तिसऱ्या बॉलाचेर बुमरा बाद जालो त्या वेळार नितीश कुमारा सयत साबार भारतीय क्रिकेट मोग्यांच्या काळजांत कच्च जालां आसतलें. कारण पॅट कमिन्स बॉलींग करतालो आनी ताचे तीन बॉल बाकी आशिल्ले. आतां नितिशाच्या शेंकड्याची आस्त फकत मोहम्मद सिराजाचे बॅटिंगेचेर निंबून आशिल्ली. अखेरेक ताणें आपलो पयलो शेंकडो पुर्ण केलो आनी मैदानाचेर एकूच जल्लौश जालो.
नितीशान भारताच्या हातांतली वचपी मॅच आपले बॅटिंगेन आनी वॉशिंग्टन सुंदरा वांगडा मेळून 127 धांवड्यांची म्हत्वाची भागिदारी करून भारताक मॅचींत परतून हाडलो.
नितीश बॅटिंगेक आयिल्लो त्या वेळार भारतान 191 धांवड्यांचेर 7 विकेटी व्हगडायिल्ल्यो. भारता मुखार फॉलोऑन वाटावपाचें आव्हान आशिल्लें आनी तें वाटावपा खातीर आनीक 84 धांवड्यांची गरज आशिल्ली.
वॉशिंग्टन आनी नितीश हांणी भारताचो डाव सांबाळपाक सुरवात केली आनी पावसाक लागून च्या चो विसव घेतलो त्या वेळार रेड्डी आनी वॉशिंग्टन हाणें भारताचो स्कोर 327 मेरेन पावयिल्लो.
च्या च्या विसवा उपरांत परतून खेळ सुरू जालो त्या वेळार दोगांकूय लय मेळोवपाक मात्सो वगत लागलो. पूण, नितीश पळयता पळयता 95चेर पाविल्लो आनी वॉशिंग्टनान आपलो अर्द शेंकडो पुर्ण केल्लो. नितीश 95चेर पावना फुडें ऑस्ट्रेलियेंत आठवे सुवातेर सगल्यांत व्हड वैयक्तीक धांवड्यो करपी पयले भारतीय बॅट्समन थारलो.
नितीश आनी वॉशिंग्टन हाणें लागीं लागीं समान रितीन बॉलांक तोंड दिल्लें. पूण, पूण, नितीश एके वटेन धांवड्यो करपाची एकूय संद सोडिनाशिल्लो जाल्यार वॉशिंग्टन बॉलरांक कसलीच संद दिनाशिल्लो. पूण, वॉशिंग्टन वैयक्तीक 50 धांवड्यांचेर बाद जाल्या उपरांत ऑस्ट्रेलियेच्या बॉलरांनी नितीशाक धांवड्यो करपाची संद न दिवपाची रणनिती आपणायली.
97 धांवड्यांचेर नितीशान बोलॅण्डाचे बॉलिंगेचेर सको मारपाचो यत्न केलो. पूण, बॉल मिड ऑफ आनी कव्हरा मदीं पडलो. ताका लागून नितीशाक दोन धांवड्यो मेळ्ळ्यो आनी तो 99चेर पावलो. सिराजान उरिल्ले तीन बॉल खेळून काडले. अखेरेक नितीशान बोलॅण्डाचो फुलर बॉल लॉंग ऑनांत मारून 171 बॉलांनी शेंकडो पुर्ण केलो.
ते उपरांत उण्या उजवाडाक लागून फकत एकूच ओव्हर जाली. भारत अजून ऑस्ट्रेलिये परस 116 धांवड्यांनी फाटीं आसा. नितीशाचे खेळीन भारताक किमान मॅच वाटावपाची संद दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
