भांगरभूंय | प्रतिनिधी
नवी दिल्ली, खबरां संस्थाः भाजपाचे 12वे राष्ट्रीय अध्यक्ष म्हूण नितीन नवीन हांची विरोधाविणें निवड जाली. मंगळारा भाजप मुख्यालयांत ही घोशणा केली. प्रधानमंत्री नरेंद्र मोदी हांणी तांकां परबीं दिली.
अध्यक्षपदा खातीर सोमारा भाजपाच्या मुखेल कार्यालयांत वेंचणूक जाली. हेर खंयच्याच उमेदवारान उमेदवारी अर्ज भरुंक नाशिल्ल्यान नवीन विरोधाविणें वेंचून आयलें. नवीन हांची 14 डिसेंबर 2025 दिसा पक्षाचे कार्यवाह अध्यक्ष म्हूण नेमणूक जाल्ली.
भाजपाच्या नवी दिल्लींतल्या मुख्यालयांत जाल्ल्या सुवाळ्यांत नितीन नवीन हांणी नवे राष्ट्रीय अध्यक्ष म्हूण ताबो स्विकारलो. ह्या वेळार प्रधानमंत्री नरेंद्र मोदी, केंद्रीय गृहमंत्री अमित शहा, संरक्षणमंत्री राजनाथ सिंग, जे.पी. नड्डा, गोंयचे मुख्यमंत्री डॉ. प्रमोद सावंत, केंद्रीय राज्यमंत्री श्रीपाद नायक हांचे सयत भाजपाचे वरीश्ठ फुडारी आनी हेर राज्यांतले मुख्यमंत्री हाजीर आशिल्लें.
भाजपाच्या कार्यकर्त्यां कडेन संवाद सादतना प्रधानमंत्री मोदी हांणी सांगलें, पक्षाची गजाल येता तेन्ना नितीन नवीन हें बॉस आनी हांव एक सादारण कार्यकर्ते. आतां मेरेन आपूण दिल्ली दरेक जापसालदारकी पुराय प्रामाणीकपणान आनी येसस्वीपणान पुराय केल्या अशेंय प्रधानमंत्र्यांन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
