भांगरभूंय | प्रतिनिधी
पणजी: नितीन कोरगांवकार हांणी निश्ठापुर्वक संगिताची सेवा केल्या. मैफलीचो नूर इबाडूंक दिनासतना तबल्याची साथ करप हो तांचो गुणविशेश. तांची सांस्कृतीक पत्रकारिता लेगीत आदर्श थारल्या अशें प्रा. अनील सामंत हांणी सांगलें.
स्वररधाराचो 15 वो नादश्री पुरस्कार आयएमबी सभाघरांत नामनेचे संगीतकार अशोक पत्की हांचे हस्तुकीं नामनेचे तबलो वादक नितीन कोरगांवकार हांकां भेटयलो. ह्या वेळार मुखेल उलोवपी म्हूण प्रा. अनील सामंत उलयताले. शाल, श्रीफळ, सरस्वतीची मूर्त, मानपत्र आनी रोख रक्कम अशें पुरस्काराचें स्वरुप आशिल्लें. मानपत्राचें लेखन डॉ. सोमनाथ कोमरपंत हांणी केल्लें.
अशोक पत्की हांणी स्वरधाराच्या उपक्रमाची तोखणाय केली आनी नितीन कोरगांवकार हांचें अभिनंदन पुरब से सुरज उगा… आनी मिले सूर मेरा तुम्हारा… ह्या आपणें संगीत दिल्ल्या गीतां विशींच्यो यादी सांगल्यो.
मानाचे सोयरे म्हूण अतूल मिश्रा हांणी स्वरधाराची तोखणाय करून काेरगांवकार हांचो गौरवान उल्लेख केलो. स्वरधाराच्यो अध्यक्षा रजनी ठाकूर हांणी येवकार दिलो.
नितीन कोरगांवकार हांणी आपल्या मनोगतांत सांगलें, अशोक पत्की हांचे हस्तुकीं पुरस्कार मेळिल्ल्यान हांव धन्य जालां. म्हज्या गुरुंचो आशिर्वाद म्हूण हांव हो पुरस्कार स्विकारतां. स्वरधाराचो हो पुरस्कार म्हजे जिणेंत यादींत उरपा सारको खीण.
सोनिया शिरोडकार हांणी सरिता (निलेखा) कोरगांवकार हांची व्हंट भरली. मानसी वाळवेन सुत्रसंचालन केलें. गौरी सालेलकारान मानेस्तांक फुलांतुरे भेटयले. समार्या ठाकूर, सानिया वाघ आनी त्रयी वालावकार हांणी प्रार्थना म्हणली. सचीव नीलम फातर्पेंकार हांणी उपकार मानले.
ह्या वेळार डॉ. प्रदीप बोरकार हांणी काडिल्लें नितीन कोरगांवकार हांचे पोट्रेट तांकां भेट दिलें. ह्या सुवाळ्याक कोरगांवकार हांचे कुटूंब, इश्ट, विवीध मळावेले मानेस्त व्हड संख्येन हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
