भांगरभूंय | प्रतिनिधी
तळसाण मागीर ती घरांतली जावं नाजाल्यार भायल्या वाठारांतली, मनशाचे आनी पर्यावरणाचे भलायकी खातीर सामकी गरजेची. ते खातीरदरेकल्यान आपलें घर, सरभोंवतण, वाडो, गांव नितळ उरचो म्हणून वावरूंक जाय. हे ताचें समाजीक कर्तव्य हे वेगळें सांगपाक नाका. घराघरांतल्या प्रत्येकान कोयराचो वेवस्थित विलो लायला जाल्यार आमचो वाठार नितळ उरतलो आनी ताचो आमकांच फायदो जातलो. पयरूच बोगमाळो वाठारांत नितळ सुजल शक्ती सन्मान कार्यावळ जाली. तातूंत पंचायत मंत्री माविन गुदिन्होन नितळसाण राखात, नाजाल्यार कारवाय करपाची शिटकावणी दिल्या.
ती फक्त पंचायतींकूच न्हय तर आमकां नागरिकांकूय हे आमी विसरूंक फावना. कोयराचो विलो लावप हें सगळ्यांचें कर्तव्य. पूण ताका आमी पाळो दिनात आनी पंचायत तें मनार घेना. न्यायालयान तसो आदेश दिवन पसून.
कालूच कर्नाटकाचे आदले मुख्यमंत्री बी. एस. येडियुरप्पा हांकां एक अणभव आयलो. तो कोयरा कडेनूच संबंदीत आशिल्लो. रोखड्योच कर्नाटकांत विधानसभा वेंचणुको जावपाच्यो आसात. ते खातीर प्रचारूय चालू जाला. प्रचारा संदर्भात हेलिकॉप्टरांतल्यान वतना तांकां सुमार अर्दवर हवेंत ताटकळत रावचें पडलें. कारण कितें तर जमनी वयलो कोयर आनी प्लास्टीक. हॅलिपॅडार हेलिकॉप्टर तशेंच देवयिल्लें जाल्यार दुर्घटना जावं येताली. मनीस निर्मित कोयर कितें करपाक शकता, ताचें हे जितें जिवें उदाहरण. जर पायलटान ताकतिक केल्ली जाल्यार ते जिवाचेर बेतपाचें. आमच्या जात्रा, काल्यांनी पसून कोयर जाता. तो पर्यावरणाक बाधक थारता. न्हंयो, व्हाळांनी प्लास्टीक पोतयो, बाटल्यो गेल्यो काय कितें जाता ताचो बेसबरो अणभव आमकां येता. खास करून पावसाच्या दिसांनी. शारांतले रस्ते उदकान भरून उरतात ताचे फाटल्यान हो कोयरुच आसता.
गोंय नितळ उरचें म्हूण कांय वर्सां पयलीं घरांनी भोवन पंचायती, पालिकांनी कोयर एकठांय करपाची मोहीम चालीक लागली. मजा म्हणल्यार तेन्ना सावन कोयराचें प्रमाण वाडपाक लागलें. अर्थांत हाका बदलतो काळूय तितलोच जापसालदार आसा. आयज प्रत्येक गजाल प्लास्टिकांत गुठलावन येता. धान्य, कड्डण, चिप्स… उदक पसून प्लास्टीक बाटल्यांनी. हो कोयर स्वराज्य संस्था नितळ करतात खऱ्यो. पूण सुक्या आनी ओल्या कोयरांचो विलो कसो लावप हो प्रस्न ब्रह्मराक्षस कसो सगल्यांच्याच मुखार उबो रावला. न्यायालयान बडी मारून पसून कांय पंचायतींनी कोयराचो विलो लावपाची समस्या हाताळूंक ना. गांवूय तो कोयर आपल्याक नाका म्हणटा. कांय पंचायत पालिकां कडेन कोयर विलो प्रकल्प आसात. पूण आपल्या वाठारा भायलो कोयर घेवक्पाची तांची तयारी ना. तांकां घाणी, गुठण्णीची भिरांत आनी कोणे कितेलेंय सांगलें तरी घाणी मारतातूच. तेन्ना फुडल्या काळांत कोयराची ही समस्या वाडटलीच हें घट मतींत दवरून प्रत्येकाक पावलां मुखार घालचीं पडटलीं.
सरकाराच्या मतान कांय पंचायती सुको आनी ओलो कोयर वेगवेगळो करिनात. मात सरकारान आतां हें मनार घेतलां. नितळ भारत मोहिमे खाला मिशन म्हूण कोयराचो प्रस्न सोडोवपाचें तांणी थारायलां. अर्थांत हाका पंचायतीचें आनी नागरिकांचे साह्य मेळपाक जाय. रस्त्या कुशीक कोयर उडोवपाची परंपरा ना नपयत जाल्यार अर्दी लढाय जिखली म्हणपाची.
कोयराची समस्या सोडयतलो जाल्यार प्लास्टिकाक पर्याय सोदपाक जाय, हें कोणूय मान्य करतलो. अर्थांत हें शास्त्रज्ञांचें काम. कांय म्हयन्यां पयलीं प्लास्टिक नश्ट करपी विशाणूंचो सोद लागिल्ल्याची खबर आयिल्ली. मात ताचेर मुखार उजवाड पडूंक ना. ह्या प्लास्टिक पोतयांक पर्याय मेळना तो मेरेन कोयराच्यो ह्यो राशी वाडतूच रावतल्यो. कापडी पोतयो वापरप हो एक पर्याय जालो. पूण साबार जिनस प्लास्टिकांत गुठलावन येतात ताचें कितें करतलो? कारण बारीकसाणेन पळयल्यार होच कोयर आमकां आशी कुशीक दिसता. ताचेरूय सरकार, थळाव्या विज्ञानिक संस्थांनी विचार करूंक फावो. उपाय सांपडलो जाल्यार आमचें पर्यावरण, सैम वाटावतलें, फुलतलें, फळटलें !
स्वच्छ भारत, नितळ गोंय ही मोहीम वयलेंचाराक घेत जाल्यार पर्यावरण नितळ जावचें ना. …. नाजाल्यार कारवाय… हें प्रत्यक्षांत आयलें जाल्यार कितें तरी परिणाम दिसतलो. न्यायालयांनीय कोयर विलो प्रकल्पांचो फेरनियाळ घेवन पंचायतींनी
कितले मेरेन काम केला ते पळोवंक फावो. कारण कळटा पूण वळना अशी परिस्थिती आसा. फोर्सान कामाक लायलें बगर कोण कामाक लागचे नात. परिणाम, थेंबा थेंबान तळें
साचता तसो कोयर वाडत रावतलो, आनी ….? तें सगल्यांक खबर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
