भांगरभूंय | प्रतिनिधी
गोंयचें राजपाटण पणजी शार 2015 वर्सा केंद्रीय स्मार्ट सिटी मिशना खाला पावलें. आदले संरक्षणमंत्री मनोहर पर्रीकार हांणी ते खातीर केल्ले यत्न मोलादिक. ते पणजेचे सगल्यांत चड तेंप उरिल्ले लोकप्रतिनिधी. न्हंयेचे देगेर आशिल्ल्या संवसारांतल्या शारांतलें पणजी हें एक शार. स्मार्ट सिटी मिशनात धा वर्सां आदीं पाविल्ले पणजेक नितळसाण सर्वेक्षणांत उंचेलो पावंडो मेळ्ळा. ह्या जैताक पावसाळी विधानसभेंत थारावांतल्यान शाबासकी मेळपाक जाय. चकाचक मिशनांतल्यान पणजी स्मार्ट सिटी जावपाचे वाटेर आसतना राजपाटणातलें 500 वर्सां आदलें दायज मोडपाक पावलां. ताका कितलो तेंप धिगयो लावप हें थारावपाचो होच वगत. वेळार निर्णय घेवन कांपाल वाॅक वे, तिसरो मांडवी, पाटो पूल बांदिल्ल्यान वेवहार चालू उरल्यात. नितळसाणींतल्यान शारांतले मुखेल वाठार, रस्ते उदका खाला गेले नात. पणजे लागसाल्लीं, हेर वाठारांतलीं मिठागरां वाटावन गोंय मीठ उद्देगांत स्वयंपूर्ण करपाचो निश्चेव करचो. दोन वर्सां भितर पणजी 100 टक्के स्मार्ट जातली हें सपन पळोवया.
पणजी स्मार्ट शार जातना मडगांव, मुरगांव, म्हापशें ह्या तीन व्हड शारांक शार सुदारप येवजणेंत आसपावपाची गरज आसा. शार उदरगतमंत्री विश्वजीत राणे राजपाटणात शिकिल्ले, राविल्ल्यान पणजेचे उदरगतीचेर तांची नदर आसता. राजपाटणातलें मुख्यमंत्र्यांचे सरकारी राबीतो थळ तांचे वळखीचें. पणजेतलें आल्तिन दोंगुल्लेचें दायज वाटावपाक बांदकामांचेर बंदी घालप गरजेचें.
पणजे पासत केल्ले इमेजिन पणजी कंपनीचें ‘इमेजिन गोंय’ जावंक शकता. मडगांव, म्हापशें, मुरगांव नगरपालिकांचेर आशिल्ले थळावे अधिकारी, इंजिनियर्स, आर्किटेक्टांक विश्वासांत घेवन त्या शारांक स्मार्ट करपाच्यो येवजणी बांदच्यो. पणजी स्मार्ट सिटीची दिका शारांतल्या नागरीकांक, मतदारांक, लोकप्रतिनिधींक बराबर घेवन ठरयल्ली. दर एका शाराचें खाशेलपण आसता तें तिगोवन दवरप वेगीं बदलपी “क्लायमेट चेंज” तलें आव्हान.
तिसरो मांडवी, तिसरो पाटो पूल, कांपाल वाॅक वे, पाटो प्लाझा वयलो नरीमन पाॅयंट पणजेचें फुडारांत दायज म्हणून उरतलें? ह्या प्रस्नाचेर आदले मुख्यमंत्री पर्रीकार चिंतताले आसूंये. इंजिनियर आशिल्ल्यान, मुंबय शिकिल्ल्यान उण्या, चड तेंपाच्या येवजणेचें म्हत्व तांकां खबर आशिल्लें. आपूण दोन भुरग्यांचोच न्हय, तर गोंयचो, गोंयच्या राजपाटणाचो बापूय हाची जाणवीकाय तांकां आशिल्ली. पयलींचे मुख्यमंत्री प्रतापसिंह राणे आपलो आदर्श अशें मेकळ्या मनान सांगपी पर्रीकार हे फुडाराची देख आशिल्ले. नितळसाणींतल्यान पणजी, प्लास्टिकांतल्यान भायर सरपा पासत ताणीं केल्ली येवजण 100 टक्के चालीक लागची. ते खातीर राखून दवरिल्ले भुंयेंत हेर बांदकामां नाकात. शारा लागसल्लीं शेतां, उदकाचे झरे बुडयिल्ल्यान पाटो प्लाझा कडेन वचपी रस्तो बुडटा. रस्त्याची उंचाय देंवोवन, लागसल्ल्यो पोरण्यो बिल्डिंगो मोडून रस्त्याची रुंदाय वाडोवन खळयो बेगोबेग बांदूंक जाय.
न्हंय, दर्यादेगेर आशिल्लीं शारां, गांव बुडपाचे आसात असो फुडार सांगपी विज्ञानिक आसात. बुडटी आळेबंदा हाडपा पासत उपाय आसात. वेळार वखद (उपाय) केल्यार, सांगल्यार शारां, गांव, व्हडीं, फेरीबोटी, बोटी, मनीस बुडचेनात. पणजी 100 टक्के स्मार्ट, नितळ जावंक ना. नवे बांदावळींतले रस्ते स्मार्ट सिटीचे वाटेर आशिल्ल्या शाराक मेळ्ळे. शार येणावळ पाॅयंट जाल्ल्यान येरादारीची कोयंडी वाडटा. वीस- बावीस वर्सा आदीं बांदिल्लें मुखेल मार्केट, दयानंद बांदोडकर मार्गा वयल्यो कला अकादमी भायल्यो पासयो, झाडांक घाल्ली काँक्रिटची चौकट मोडटा. इमेजिन पणजेच्या अधिकाऱ्यांनी म्हापालिकेच्या अधिकाऱ्यांक वांगडा घेवन चलल्यार नितळ, स्मार्ट करपाच्यो अचूक सुवाती दिसतल्यो.
शारांत वाचपघर आसा, बिल्डिंगो आसात, नव्यो सुविधा, बरीं टाॅयलेटस आसात. तांचो उपेग शारांतले, गोंयचे, देसांतले लोक शंभर टक्के करतात? शार उदरगतींत आशिल्ले कंत्राटदार कामगारांक नितळसाण शिकयतात? स्मार्ट सिटीच्या मुखेल वावरांतल्यान कुशीक उरिल्ली म्हापालिका फकत नितळसाणेंत बुडल्या. शार नितळसाणीच्या पावंड्यार पणजेक व्हरपाक म्हापालिका जापसालदार. सगल्यांत ल्हान म्हापालिकेची बांदावळ फुडें व्हरपी, शारांतल्या येरादारीक शिस्त लावपी आदल्या संरक्षणमंत्र्यांनी म्हापालिकेच्या नितळसाणीचो लाव ताळगांव मतदारसंघा मेरेन पावयला.
स्मार्ट पणजेच्या नितळसाणीन ताळगांव, बांबोळी वाठाराक स्मार्टनेस आयला हातूंत दुबाव ना. कांपाला वयलें परेड मैदान 19 डिसेंबर, 2025 मेरेन लोकां पासत उगतें करपाची वाट मेकळी जाल्या. नवें खेळांगण, नव्यो साधनसुविधा नितळसाणीच्या वाटे वयल्यान पणजेक मेळ्ळ्यात. तांचेर देखरेख दवरपी वेवस्था, नवे स्मार्ट कला अकादमीचे बुन्यादीची बेगीन तजवीज जातली अशी आस्त बाळगूया. नितळ पणजी, निर्मळ पणजी ही मोख सरकारा मुखार आसची.
मिशन चकाचकांतल्यान कोयर वेवस्थापन, कोयराचे ट्रक, कोयराचे डबे पणजे, ताळगांवच्या वाठाराक मेळ्ळे. सुको, वलो कोयराचो विलो लावपाक वाॅर्डा- वाॅर्डांतल्यान जागोवपी पणजे म्हापालिकेचे पयले आयुक्त संजित राॅड्रिग्ज देस पावंड्यार पावल्यात. इ- कोयराचें वेवस्थापन, शारांतल्या जार्दिन्याची नवी बांदावळ स्मार्ट पणजेचे नवे येवजणेंत आसपावची. पणजी म्हापालिकेची नवी बिल्डिंग जातना तळमजल्यार पार्किंग वेवस्था करुन नगरपालिकांक देख दिवची पडटली.
शारांतलें गुजरात लाॅज आस्थापन बंद जालां. आस्थापनाचे धनी ताळगांव, पणजेच्या हेर वाठारांत बदल आपणावन वेवसाय करतात. जुन्ता हावस बिल्डिंगेचें स्ट्रक्चरल आॅडिट करतना बिल्डिंगेच्या बुन्यादीचें आॅडिट जालां? बुन्याद, खांबे सारके आसल्यार तेच बिल्डिंगेची नवनिर्मणी करुंक येतली. जें जुन्ता हावसाचे बिल्डिंगेचें तेंच उत्तर गोंय जिल्लोधिकारी, गोंय पुलिसांच्या मुखेल कचेऱ्यांचें, आदिलशहाचे पालाशीचें, माकनिझ पालास आनी इफ्फी थळाचें.
राजपाटण पणजी चड स्मार्ट जातना मोडिल्ल्या बिल्डिंगेंत काँक्रीट कोयर, माती वेवस्थापन जायत व्हय? कसिनो कचेऱ्यो शारा भायर व्हरात.
राजपाटणातलें मंत्रालय, विधानसभा, सचिवालय, सरकारी खातीं, हायकोर्ट पर्वरे गेल्यांत. पर्वरी बार्देस तालुक्यांतले पंचायतीचो वाठार, आयज आदलेवरी ना. पणजेच्या मार्गान पर्वरेक व्हरतना पर्वरींतय राजपाटणावरी साधनसुविधा जावच्यो म्हणून येवजणी जाल्यात. त्या येवजणींतल्यान गोंयच्या दुसऱ्या राजपाटणाचो पावंडो पर्वरेक दिवपाक कायद्याची बांदावळ जावची. 2027 विधानसभा वेंचणुके मेरेन ती जातली हे खातीर विधानसभेच्या सगल्या वांगड्यांनी उलो मारचो.
आपल्या मतदारसंघाचे उदरगती बराबर गोंयच्या कोनशांनी कदंब बस पावोवपी आदले मुख्यमंत्री श्री. राणे पर्वरेच्या उदरगतीक आरंभ करपी. पर्वरेंतली उदका पुरवण सुदारपाची येवजण पुराय जायत आयल्या. गोंयचें दुसरें राजपाटण जातना पर्वरे स्वतंत्र शार जावन बार्देस तालुक्याच्या उदरगतींत कशें उरतलें ताचो अभ्यास करचो.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
