भांगरभूंय | प्रतिनिधी
प्रधानमंत्र्यांच्या उल्याक सरकारी कर्मचाऱ्यां सयत लोकांचो उत्स्फूर्त प्रतिसाद
भांगरभूंय । प्रतिनिधी
पणजीः गांधी जयंती निमतान प्रधानमंत्री नरेंद्र मोदी हांणी नितळसाणी संबंदांत ‘एक तारीख, एक वर’ ह्या उल्याक गोंयभरांतल्यान उत्स्फूर्त प्रतिसाद मेळ्ळो. मुख्यमंत्री डॉ. प्रमोद सावंत, केंद्रीय मंत्री श्रीपाद नायक हांचे सयत हेर मंत्री आनी आमदारांनी आपापल्या मतदारसंघांतले नितळसाण मोहिमेंत वांटो घेतलो.
राष्ट्रपिता महात्मा गांधी जयंती निमतान दर वर्सा देशभरांत नितळसाण मोहीम आयोजीत करतात. प्रधानमंत्री मोदी हांणी कांय दिसां आदीं हे संबंदांत ‘एक तारीख, एक वर, एकठांय’ची घोशणा करून, देशभरांतल्या लोकांक एक दीस नितळसाणी खातीर दिवपाचो उलो मारिल्लो.
गोंयांतल्या सगळ्याच वाठारांनी आयतारा हे मोहिमेचें आयोजन केल्लें. प्रधानमंत्री मोदी हांच्या उल्याक प्रतिसाद दिवन गोंयांतले मंत्री, आमदार, थळावे लोकप्रतिनिधी, सगळींच सरकारी कार्यालयां तशेंच शिक्षण संस्थांनी हे मोहिमेक उत्स्पूर्त प्रतिसाद दिवन विवीध वाठारांनी नितळसाण मोहीम चालीक लायली.
मुख्यमंत्री डॉ. प्रमोद सावंत, केंद्रीय मंत्री श्रीपाद नायक, मंत्री विश्वजीत राणे, रोहन खंवटे, सुभाष फळदेसाय, आमदार डॉ. देविया राणे हांचे सयत सगळेच मंत्री, आमदार तशेंच थळावे सरपंच, पंच, नगराध्यक्ष, नगरसेविकांनी हे मोहिमेंत सक्रीय वांटो घेतलो आनी थळाव्यां वांगडा वाठाराची नितळसाण केली. शिक्षण खात्यान सगळ्याच शिक्षण संस्थांक हे मोहिमेंत वांटो घेवपाचो उलो मारिल्लो. ते प्रमाण, विशेश भुरग्यांच्या संजय स्कुला सयत हेर सगळ्याच शिक्षण संस्थांतले शिक्षक, विद्यार्थी आनी हेर कर्मचाऱ्यांनी हे मोहिमेंत वांटो घेवन आपापल्या शाळा वाठाराची नितळसाण केली.
नितळसाणीचेर वर्साक कोटींचो खर्चः मुख्यमंत्री
राज्य सरकारान सुरवाती सावनूच नितळसाणीचेर भर दिला. दर्यादेगो तशेंच हेर वाठारांतले नितळसाणीचेर सरकार दरवर्सा 100 कोटीं परस अदीक रुपया खर्च करता, अशें मुख्यमंत्री डॉ. प्रमोद सावंत हांणी आयतारा सांखळे आयोजीत केल्ले कार्यावळींत सांगलें. नितळसाणी विशीं गोंयकारांनी सरकाराक आदार करपाची गरज आसा, अशेंय तांणी सांगलें.
मुख्यमंत्र्यांचो आयज स्वयंपूर्ण मित्रां कडेन संवाद
राज्य सरकाराच्या म्हत्वकांक्षी ‘आत्मनिर्भर भारत- स्वयंपूर्ण गोंय’ मोहिमेक 2 ऑक्टोबराक चार वर्सां पुराय जातात. ते निमतान मुख्यमंत्री डॉ. प्रमोद सावंत सोमारा हे मोहिमे खाला नेमणूक केल्ल्या स्वयंपूर्ण मित्र तशेंच लोकां कडेन संवाद सादतले. स्वयंपूर्ण मित्रां वरवीं परतून एकदां गांवगिऱ्या वाठारांतले प्रलंबीत प्रस्न आनी समस्यांचो नियाळ लेगीत मुख्यमंत्री घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
