भांगरभूंय | प्रतिनिधी
नवी दिल्ली, खबरां संस्था ः नासा सुपरकंप्यूटरान नवें हाय-रिझोल्यूशन मॉडेल तयार केलां. जांतूत संवसारभर कार्बन डाय-ऑक्सायडाची पातळी पळोवंक मेळटा. नासाच्या सायन्टिफिक व्हिज्युअलायझेशन स्टुडिओन हें मॉडेल तयार केलां.
ह्या मॉडेलाक झूम करून पॉवर प्लांट, उजो आनी व्हड शारां सारकिल्ले कार्बन डाय-ऑक्सायड तयार करपी स्रोत पळोवंक मेळटात. हाचे वांगडाच कार्बन डाय-ऑक्सायड खंडांनी आनी दर्यांत कसो पातळटा तेंय पळोवंक मेळटा. हें मॉडेल सामान्य हवामान मॉडेलापरस शंबर पटींनी चड बरे आसा. ताचे वरवीं कार्बन डाय-ऑक्सायड खंयच्यान येता आनी ताचो धर्तरेचेर कसो परिणाम जाता हें जाणून घेवपाचो यत्न केला. तशेंच दरेक गजाल वेगवेगळ्या हवामान पद्दती कडेन कशी जोडिल्ली आसा हें सोंपेंपणान समजूंक शकता. चीन, अमेरिका आनी दक्षीण आशियांतल्या कार्बन डाय-ऑक्सायडाचें चडशें उत्सर्जन वीज प्रकल्प, उद्देग आनी वाहनां हांचेपसून तयार जाता. जाल्यार आफ्रिका आनी दक्षीण अमेरिका सारक्या देशांनी ते उज्यापसून तयार जाता अशें ह्या मॉडेलातल्यान स्पश्ट जाता.
आतां मेरेनचे 2023 सगळ्यांत उश्ण वर्स
संवसारभर कार्बन डाय- ऑक्सायडाची पातळी स्थिरपणान वाडत आसा आनी ताका लागून धर्तरेर उश्णताय वाडत आसा अशा काळांत हें मॉडेल तयार केलां. नासाच्या अहवाला प्रमाण 1850 वर्सा पसून संवसारीक विक्रम दवरपाक सुरवात जाले उपरांत 2023 हें सगळ्यांत उश्ण वर्स म्हणून नोंद जालां. नासाच्या मतान फाटल्या 174 वर्सांच्या विक्रमांतली 10 उश्ण वर्सां फाटल्या दशकांत (2014 ते 2013) जाल्यात. हाचें कारण म्हळ्यार वातावरणांतल्या कार्बन डाय-ऑक्सायडाचें प्रमाण वाडप.
धर्तरेचें तापमान गरजेपरस चड वाडलें
1750 वर्सा वातावरणांतल्या कार्बन डाय-ऑक्सायडाची पातळी सुमार 278 भाग दर दशलक्ष आशिल्ली. मे 2024 वर्सा ती वाडून 427 भाग दर दशलक्ष इतली जाली. धर्तरेचें तापमान तिगोवन दवरपाखातीर कार्बन डाय-ऑक्सायड गरजेचें आसा, पूण फाटल्या शेंकड्यांत ह्या वायूंत खूब वाड जाल्ल्यान धर्तरेर गरजेपरस चड उश्णताय वाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
