भांगरभूंय | प्रतिनिधी
संवसारभर वेगवेगळे दीस उमेदीन मनयतात. 16 ऑक्टोबर हो संवसारीक अन्न दीस म्हूण मनयतात. अन्न दीस म्हत्वाचो मानचो, कारण ताचो सरळ संबंद मनशाच्या जिविताच्या अस्तित्वा कडेन आसता. अन्न सुरक्षा संबंदी एकंदर परिस्थिती पळोवन अन्न दिसा विशीं जागृताय वाडोवपाची गरज आसा. पूण आयज लेगीत आमी अन्न सुरक्षा आनी अन्नधान्याचो नाश करपा विशीं गंभीर नात.
आमची संस्कृताय सांगता की अन्न हे पूर्णब्रह्म. पूण आमी ही संस्कृताय विसरतात. हालींच एक अहवाल आयला जो हे विशीं प्रस्न उप्रासता. संयुक्त राष्ट्रांच्या पर्यावरण कार्यावळ आनी भागीदार संघटनेच्या डब्ल्यूआरएपीच्या अहवाला प्रमाण, आमच्या देशांत दर वर्सा 68 कोटी टन धान्य फुकट वता. हातूंतलें 61 टक्के अन्न घरांतल्यान, 26 टक्के अन्न सेवां वयल्यान आनी 13 टक्के किरकोळ क्षेत्रांतल्यान वाया वता. भारता सारक्या शेतकी देशांत इतले व्हड प्रमाणांत अन्नधान्याचो नाश जावप ही एक वायट गजाल. भारता सारक्या विकसनशील देशांत, साठ टक्के लोक दर दिसा उपाशी वा अर्दकुटें खावन न्हिदतात थंय असो अन्नधान्याचो नाश करप परवडना. जर हें वाया अन्न गरीब आनी उपाशी लोकांक मेळ्ळे जाल्यार देशांत कोणूच उपाशी उरचे नात. पूण आमी आमची संस्कृताय विसरतात. जाय तितलेंच जेवण वाडून घेवप आनी तितलेंच खावप ही आमची परंपरा. आमची जाण्टी आमकां अन्न उडोवचे न्हय अशें सांगताली हेंय आमी विसरल्यात.
अस्तंती देशांतल्या हॉटेलांनी लेगीत ताटातलें जेवण उडोवप हो समाजीक गुन्यांव मानतात. अन्न उडोवपी गिरेस्त लोकांक उपाशी लोकांची याद लेगीत येना. देशांतले लाखांनी लोक भुक भागोवपा खातीर भीक मागतात. आदिवासी आनी कांय वाठारांनी हजारांनी लोकांक फावो त्या प्रमाणांत अन्न मेळनाशिल्ल्यान अजूनय कुपोशण जाता जाल्यार दुसरे वटेन दर दिसा लाखांनी टन अन्न उडयतात. ही विसंगती बदलपाची गरज आसा.
हें फुकट वचपी अन्न गरीबांक मेळचे अशी एक वेवस्था आसपाक जाय. हैदराबाद, चेन्नय, दिल्ली, कोलकाता, मुंबय, बेंगळूर ह्या सारक्या व्हड शारांनी हॉटेलां, रेस्टॉरंट आनी घरांनी उरिल्लें जेवण गरिबांक मेळोवन दिवपा खातीर सामुदायिक रांदची कूड चालीक लायली. हे संकल्पने प्रमाण उरिल्लें जेवण शारांच्या वेगवेगळ्या वाठारांनी रस्त्यार आशिल्ल्या सामुदायिक रांदचे कुडीच्या व्हड फ्रिजांत दवरतात. सामुदायिक रांदची कूड सारकी संकल्पना दरेका शारांत व्हड प्रमाणांत चालीक लावची, जाका लागून अन्न उडोवपाक पडचे ना आनी अन्नाची नासाडी बंद जातली.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
