भांगरभूंय | प्रतिनिधी
केप कॅनाव्हरल, खबरां संस्था: अमेरिकेंतल्या ‘नासा’चे विवीध प्रयोग सामान घेवन ‘फायरफ्लाय एअरोस्पेस’ कंपनीचे ‘ब्लू घोस्ट’ हें ‘अंतरीक्ष यान’ चंद्रार आयतारा येसस्वीपणान देंवलें. ‘ब्लू घोस्ट’ हें चंद्राचेर देंवपी पयलें खासगी आनी फकत दुसरें वेवसायीक यान जावन आसा. अंतरीक्ष मळार वेवसायीक सोदांत व्हड पावल म्हणून ह्या प्रयोगाकडेन पळयतात.
फ्लोरिडाच्यान १५ जानेवारीक ‘ब्लू घोस्टचे प्रक्षेपण केलें. तें चंद्रावेल्या कक्षेंतल्यान स्वताच्याच तंत्रा वरवीं चंद्रार येसस्वीपणान (सॉफ्ट लँडींग) देंवलें. लँडर येसस्वीपणान चंद्रार देंविल्ल्याची ‘फायरफ्लाय एअरोस्पेस’च्या टेक्सास हांगच्या नियंत्रक कक्षा वतीन पुश्टी केली. ‘ब्लू घोस्ट’च्या प्रक्षेपणा खातीर १०.१ कोटी डॉलर जाल्यार, यानांतल्या तंत्रज्ञाना खातीर ४.४ कोटी डॉलर खर्च आयलो.
चंद्रार अंतरीक्ष यान येसस्वीपणान देंवोवपी ‘फायरफ्लाय’ ही पयली खाजगी कंपनी थारली. धर्तरेवेल्यान दिसपी चंद्रावेल्या बर्याच व्हड विवरांचो सोद घेवप हो हे मोहिमेचो हेतू जावन आसा. नासा आनी खाजगी कंपन्यांच्या जोड उपक्रमा वरवीं सामको हालींकडचो उपक्रम म्हणून हे मोहिमे कडेन पळयतात.
‘फायरफ्लाय’चे मुखेल अभियंता विल कूगन हांणी म्हायती दिली, चंद्रार उबे आनी अतिशय स्थिरतायेन यान देंवयलें. चंद्रार अंतरीक्ष यान येसस्वीपणान देंवपी ‘फायरफ्लाय’ ही पयली खासगी कंपनी थारली. आतां मेरेन रशिया, अमेरिका, चीन, भारत आनी जपानान चंद्रार अंतरीक्ष यान सुरळीत देंवयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
