भांगरभूंय | प्रतिनिधी
१ जानेवारी सावन धाडटलें डेटा
वॉशिंगटन, खबरां संस्था: अमेरिकेची संस्था नासाचें अंतराळ यान पार्कर सोलर प्रोब २४ डिसेंबराक सांजेवेळार सूर्याच्या सामकें लागीं पावपाचो विक्रम केला. नासाचें हें यान सूर्या पसून सुमार ६१ लाख किमी अंतरा वेल्यान गेलें. असो विक्रम करपी हें संवसारांतलें पयलें यान. एजन्सीन मुखार सांगलें , पार्कर सोलर प्रोब अंतराळ यान १ जानेवारीक ताची स्थिती आनी सोद घेतिल्ले वळेरेचो डेटा धाडटलें. सुर्या लागसारच्यान वतना अंतराळयानाचो वेग वराक ६.९ लाख किमी परस चड आशिल्लो. तेन्ना हें यान ९८२ अंश सेल्सिअसच्या उश्णतायेक तोंड दितालें. इतलें खर वत आसून लेगीत यानाचें कसलेंच लुकसाण जावंक ना. पार्कर सुर्याच्या वातावरणांतल्यान गेलें ताका कोरोना म्हणटात. सूर्य आनी ताचो आपल्या सौरमाळयेर जावपी परिणाम समजून घेवपाचे दिकेन हें एक व्हड पावल.
नासा कडल्यान मेळिल्ले म्हायती प्रमाण, पार्कर सोलर प्रोबान २७ डिसेंबराक धर्तरेर नासाच्या जॉन्स हॉपकिन्स अप्लायड फिजिक्स लॅबोरेटरी टिमीक एक सिग्नल धाडलें. जाका लागून शास्त्रज्ञांक तें सुरक्षीत आनी योग्य तरेन काम करता हाची खात्री पटली. नासाचे हे मोहिमेचो उद्देश धर्तरेच्या सगळ्यांत लागीं आशिल्ल्या सुर्याविशीं अधीक म्हायती एकठांय करप आसा. सुर्याच्या हेर वातावरणांत अंतराळयानाच्या प्रवेशाक लागून शास्त्रज्ञांक सुर्याविशीं आनीक गजाली जाणून घेवपाक मजत जातली.
पार्कर सोलर प्रोब १२ ऑगस्ट २०१८ दिसा नासान प्रक्षेपीत केलें. कोरोना, सुर्याच्या हेर वातावरणाचो बारकायेन अभ्यास करपाच्या हेतान हें लॉन्च केलें. हाचे वरवीं सौर वार्याचीं यंत्रणां समजून घेवपाचो यत्न करता. सौर शास्त्रज्ञ यूजीन पार्कर हांच्या नांवावेल्यानूय ह्या यंत्राचें नांव दिलां. पार्कर हांणी सगळ्यांत पयलीं वार्याची म्हायती दिली. २०२२त यूजीन पार्कर हांकां मरण आयलें. पयलेच फावट एखाद्या शास्त्रज्ञाच्या नांवाचेर अंतराळयानाचें नांव दवरलें आनी तेय बी ते जिवे आसतनाच.
पार्कर सोलर प्रोबान २०२१त पयलेच फावट सुर्या लागसारा उड्डाण केलें. इतिहासांत पयलेच फावट एक यान सुर्याच्या इतल्या लागसारच्यान गेल्लें. हें वट्ट २४ वेळा सुर्या लागसारच्यान वचपा खातीर डिझायन केल्लें. सुर्याचे उश्णताये पसून संरक्षण करपाक, तें ४.५-इंच जाड कार्बन-संमिश्र उश्णता शील्ड सयत सुसज्ज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
