भांगरभूंय | प्रतिनिधी
पणजी : नावेलेच्या एडबर्ग परेरा हाका पुलीस चौकेंत मारपेट जाल्ल्या प्रकरणांत पुलीस खात्यान एका उपनिरीक्षकाक निलंबीत केला. तशेंच घडणूक घडली तेन्ना थंय हाजीर आशिल्ल्या सगल्या पुलिसांचेर खुनाच्या यत्नाचो गुन्यांव दाखल करचो अशी मागणी आम आदमी पक्षाचे प्रदेशाध्यक्ष अमित पालेकार हांणी केली. बुधवारा ते गोंय वैजकी महाविद्यालयांत परेरा हांच्या कुटुंबीयांक वचून मेळ्ळे. ह्या वेळार सिद्धेश भगत हाजीर आशिल्ले.
पालेकर हांणी सांगलें, गोंयच्या कायदो आनी सुवेवस्था पुरायेन वाट लागल्या. हांगा फारपेटाचीं प्रकरणां जातनाच आतां पुलीसूय गुंडां प्रमाण वागतना दिसतात. एडबर्गच्या कुटुंबीयांनी सांगिल्ले प्रमाण, नावेलेची घडणूक २१ ऑक्टोबराक घडिल्ली. एडबर्गचेर एके गाडयेक धपको मारिल्ल्याचो आरोप आशिल्लो. ह्या प्रकरणांत पुलिसांनी ताका पुलीस स्टेशनांत व्हरून कुटुंबियां मुखार मारपेट केली. ह्या वेळार ताच्या पांयांत बेडयो घाल्ल्यो अशेंय कुटुंबियांनी सांगलें. हे मारपेटींत एडबर्गचे तकलेक गंभीर दुखापत जाली. सध्या ताचेर गोमाकॉंत उपचार सुरू आसात. मात आजूनय ताची भलायकी स्थिर ना.
तांणी म्हणलें, ह्या प्रकरणांत दक्षीण गोंय पुलीस अधीक्षक टीकम सिंह वर्मा पत्रकार परिशद घेवन एडबर्ग पडिल्ल्यान ताका मार लागिल्ल्याचें सांगतात. मात एखादो मनीस पडलो काय इतली दुखापत जायना. एका पुलीस निरीक्षकाक निलंबीत करपाक इतलो वेळ कित्याक लागलो, पुलीस स्टेशनांतली सीसीटीव्ही फुटेज तपासली? सर्वोच्च न्यायालयाचे आदेश आसूनय बेडयो कित्याक घाल्यो? ह्या प्रस्नांच्यो जापो पुलिसांनी दिवप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
