नावेली स्पोर्टींग क्लबाक वस्तादपण

भांगरभूंय | प्रतिनिधी

नावेली स्पोर्टींग क्लबान बाणावलीच्या यंग स्ट्रायकर्सान आयोजीत केल्ली जाजू यादस्तीक आंतरगांव फुटबॉल सर्त जिखली. दांडो बाणावलीच्या सेंट जॉन दी बाप्तिस्त मैदानाचेर फायनलींत ताणें मांद्रेंच्या ड्युन्स स्पोर्ट्स क्लबाक 1-0 अशा फरकान हारयलो.

मॅचीचेर चड वगत ड्युन्स स्पोर्ट्स क्लबान आपलो शेक दवरिल्लो. पूण, ताका ताचो फायदो घेवपाक जमलो ना. दुसरे वटेन नावेली स्पोर्टींग क्लबान मेळिल्ले संदीचो फायदो घेत गोल करून जैत जोडलें. मॅचींतलो एकोडो आनी म्हत्वाचो गोल क्लिंटन निआस्सोन केलो.

ह्या जैतान नावेली स्पोर्टींग क्लबाक 50 हजार आनी करंड फावो जालो, जाल्यार उप वस्ताद ड्युन्स स्पोर्ट्स क्लबाक 40 हजार आनी करंडाचेर समाधान मानचें पडलें.

वैयक्तीक इनामांः अॅंथनी लोबो (सर्तींतलो उत्कृश्ट स्ट्रायकर, ड्युनि्स स्पोर्ट्स क्लब), जॉयसन कार्व्हालो (सर्तींतलो उत्कृश्ट हाफ, नावेली स्पोर्टींग क्लब), प्रतिक सावंत (सर्तींतलो उत्कृश्ट गोलकीपर, ड्युन्स स्पोर्ट्स क्लब), वॅलिण्टन डिसिल्वा (सर्तींतलो उत्कृश्ट डिफॅण्डर, नावेली स्पोर्टींग क्लब), अरुण नायक (सर्तींतलो उत्कृश्ट खेळगडो, ड्युन्स स्पोर्ट्स क्लब), एजेलो (लॉंग शॉटांतलो उत्कृश्ट गोल, यंग स्ट्रायकर्स बाणावली), कुंकळ्ळी युनियन (शिस्तीचो पंगड), प्रॅस्टली गोम्स (फायनलींतलो उत्कृश्ट स्ट्रायकर, नावेली स्पोर्टींग क्लब), क्रितिकेश गडेकार (फायनलींतलो उत्कृश्ट हाफ, ड्युन्स स्पोर्ट्स क्लब), जीत गुप्ता (फायनलींतलो उत्कृश्ट गोलकीपर, फायनलींतलो उत्कृश्ट गोलकीपर, नावेली स्पोर्टींग क्लब), विवेक कानुलकर (फायनलींतलो उत्कृश्ट डिफॅण्डर, ड्युन्स स्पोर्ट्स क्लब), क्लिंटन निआस्सो (फायनलींतलो पयलो गोल, नावेली स्पोर्टिंग क्लब).