भांगरभूंय | प्रतिनिधी
पॅरीश यूथ नुवेंक टायब्रेकरांत 6-4 अशा गोल फरकांनी हारोवन नावेली स्पोर्टिंग क्लबान 12वी काणा-बाणावली ग्रामपंचायत करंड आंतरगांव फुटबॉल सर्तीचें वस्तादपण जोडलें. काणा बाणावली स्पोर्टिंग असोसिएशनान दांडो बाणावलीच्या सेंट धी बाप्तिस्ता मैदानाचेर सर्तीचें आयोजन केल्लें.
निर्धारीत वेळाच्या खेळांत दोनूय क्लब 2-2 अशे बरोबरींत आशिल्ले. ताका लागून निकाल लावपाक टायब्रेकराचो आदार घेवचो पडलो.
पॅरीश यूथ नुवेंन पयलीं खातें उगडलें. 26व्या मिनटाक अॅल्वितो डायसान हो गोल केलो. ते उपरांत म्हणल्यार दोन मिनटांनी जॉयविन कोस्तान गोल करून स्कोर 2-0 असो केलो.
मध्यांतरा मेरेन पॅरीस यूथ नुवें 2-0 मुखार आशिल्लो. दुसऱ्या अर्दांत दोनूय क्लबांनी आक्रमक खेळ केलो. पॅरीस यूथ नुवें वस्तादपण जोडटलो अशें दिसपाक लागिल्लें. पूण, मॅचीक पांच मिनटांक बाकी आसतना नावेली स्पोर्टिंग क्लबान नेटाचो यत्न केलो आनी ताका येस लेगीत मेळ्ळें. पयलीं क्लिंटन निआस्सोन गोल करून नुवेंची आघाडी उणी केली, जाल्यार प्रॅस्टली गोम्सान बरोबरीचो गोल केलो.
टायब्रेकरांत नावेली स्पोर्टिंग क्लबा वतीन नॅश परेरा, मायरन गोम्स, सॅडरॉय कोस्ता आनी क्लिंटन निआस्सो हांणी गोल केले. पॅरीश यूथ नुवें वतीन जॉयविन कोस्ता आनी मेइसलीन बार्रेटो हांणी गोल केले.
ह्या जैतान नावेली स्पोर्टिंग क्लबाक 60 हजाराचें इनाम आनी करंड जाल्यार नुवेंक 40 हजाराचें इनाम आनी करंड फावो जालो. इनामां भेटवण सुवाळ्याक गोंय फुटबॉल संघटनेचे अध्यक्ष डॉ. कायतान फर्नांडीस उपस्थीत आशिल्ले.
हेर वैयक्तीक इनामांः सिप्रियानो बार्रेटो (सर्तींतलो उत्कृश्ट खेळगडो, एबीसी हरमल), जोनास कुलासो (फायनलींतलो उत्कृश्ट खेळगडो, पॅरीश यूथ नुवें), एल्व्हितो डायस (फायनलींतलो पयलो गोल, पॅरीश यूथ नुवें), इनासियो कुलासो (फायनलींतलो उत्कृश्ट मिडफिल्डर, पॅरीश यूथ नुवें), एडेन परेरा (फायनलींतलो उत्कृश्ट डिफॅण्डर, नावेली स्पोर्टिंग क्लब), एबीसी हरमल (शिस्तीचो क्लब).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
