भांगरभूंय | प्रतिनिधी
भाजयोय जाल्यो म्हारग; आलें पावलें 160 रुपयांचेर
भांगरभूंय । प्रतिनिधी
पणजीः दिसपट्ट्या जेवणांतलो म्हत्वाचो घटक आशिल्लो नाल्ल अजून लेगीत म्हारग आसा. सोमारा पणजी बाजारांत ल्हान आकाराचो नाल्ल 30 रुपयाक, मध्यम आकाराचो 40 रुपया जाल्यार व्हड आकाराचो नाल्ल 50 रुपया ह्या दरान विकताले. थळाव्या नाल्लांचें उत्पादन उणें जाल्ल्यान फुडारांत नाल्ल म्हारगूच उरपाची शक्यताय वेपाऱ्यांनी उक्तायल्या.
फाटल्या सप्तकाचे तुळेंत सोमारा पणजी बाजारांत कांय भाजयो म्हारग जाल्ल्यो. बाजारांत तवशीं 20 रुपयांनी वाडून 70 रुपया कील जाल्लीं. मटराचे दर 20 रुपयांनी वाडून 120 रुपया जाल्ले. बीट 10 रुपयांनी वाडून 60 रुपया कील जाले. गाजर 20 रुपयांनी वाडून परतून 80 रुपया कील जालो. बटाट आनी टमाट दरेकी 40 रुपया कील आशिल्लें जाल्यार कांदे 50 रुपया कील विकताले.
बाजारांत कोबी 40 रुपया कील जाल्यार फ्लॉवराचो एक गड्डो 40 रुपया आशिल्लो. वांयगीं 10 रुपयांनी सवाय जावन 50 रुपया जाल्लीं. मिरसांग, भेंडो, दोडकी, चिटकी, काराथीं दरेकी 80 रुपया कील आशिल्लीं. आलें 40 रुपयांनी वाडून 160 रुपया कील जालें. वालपापडी 40 रुपयांनी सवाय जावन 120 रुपयांक कील मेळटाली. ढब्बू मिरसांग 90 रुपया कील आसली. लिंबू आकारा प्रमाण 4 ते 5 रुपयांक एक नग ह्या दरान विकताले. मेथी 20 रुपया, शेपू 20 रुपया, पालक 10 रुपया, कांद्याची पात 10 रुपया, तांबडी भाजी 15 रुपया, कोथमीर 20 रुपया, वॉटेलांव 10 रुपयांक जुडी मेळटालो. तांतयां 80 ते 85 रुपयांनी डझन ह्या दरान विकताले. सोमारा फलोत्पादन मंडळाच्या गाड्यांचेर भेंडो 58 रुपया, कोबी 22 रुपया, गाजर 60 रुपया, वालपापडी 78 रुपया, मिरसांग 50 रुपया, कांदो 43 रुपया, बटाट 34 रुपया जाल्यार टमाट 2 रुपया कील आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
