नाल्लाचो दर वाडलो, आनीक वाडपाची शक्यताय

भांगरभूंय | प्रतिनिधी

पणजीः दिसपट्ट्या जेवणांतलो म्हत्वाचो घटक आशिल्लो नाल्ल सध्या म्हारग जाला. सोमारा पणजी बाजारांत मध्यम आकाराचो नाल्ल 40 त 45 रुपयांक एक मेळटालो. बाजारांत आवक उणी जाल्ल्यान फुडले कांय दीस नाल्ल आनीक म्हारग जावपाची शक्यताय वेपाऱ्यांनी उक्तायल्या. फाटल्या सप्तकाचे तुळेंत सोमारा पणजी बाजारांत कांय भाजयो कांय प्रमाणांत सवाय जाल्ल्यो, जाल्यार कांय भाजयो मात म्हारग जाल्ल्यो.

बाजारांत तवशीं 30 रुपयांनी सवाय जावन 50 रुपया कील जाल्लीं. मटर आनीक 20 रुपयांनी सवाय जावन 100 रुपया कील जाल्ले. बिट 10 रुपयांनी सवाय जावन 50 रुपया कील जाल्ले. लसून 100 रुपयांनी सवाय जावन 400 रुपयांक कील मेळटाली. गाजर 20 रुपयांनी सवाय जावन 60 रुपया कील जाल्ले. बटाट आनी टमाटां दरेकी 40 रुपया कील विकताले. कोबी 40 रुपया कील जाल्यार फ्लॉवराचो एक नग 40 रुपया आशिल्लो.

पणजी बाजारांत वायंगीं 60 रुपया कील आशिल्लीं. मिरसांग, भेंडो, घोसाळीं, चिटकी दरेकी 80 रुपया कील आशिल्ली. कारातीं 20 रुपयांनी सवाय जावन 60 रुपया कील जाल्लीं. जाल्यार आलें 40 रुपयांनी रवाय जावन 120 रुपयांक कील मेळटालें. वालपापडीचे दर 20 रुपयांनी वाडून 160 रुपया कील जाल्ले. ढब्बू मिरसांग 30 रुपयांनी सवाय जावन 90 रुपयांक कील मेळटाली.

तेचवरी लिंबू 4 रुपयांक एक नग, मेथी 20 रुपयांक, शेपू 20 रुपयांक, पालक 10 रुपयांक, कांद्याची पात 10 रुपयांक, तांबडी भाजी 15 रुपया, कोथमीर 15 रुपयांक जाल्यार ओटेलांवाची एक जुडी 10 रुपयांक मेळटाली. पमजी बाजारांत सोमारा तांतयां 85 ते 90 रुपया डझन ह्या दरान विकताले.

सोमारा फलोत्पादन मंडळाच्या गाड्यांचेर भेंडो 35 रुपया, कोबी 25 रुपया, गाजर 47 रुपया, वालपापडी 77 रुपया, मिरसांग 45 रुपया, कांदो 40 रुपया, बटाट 35 रुपया जाल्यार टमाट 23 रुपया कील आशिल्ले.

म्हस्काच्यो सांगो आयल्यो

फाटल्या कांय सप्तकां सावन पणजी बाजारांतल्यान म्हस्काचो सांगो गायब जाल्ल्यो. पुरवण उणी आशिल्ल्यान म्हस्काच्यो सांगा 600 रुपया कील मेरेन पाविल्ल्यो. सध्या बाजारांत कांय मेजक्याच सुवातांचेर म्हस्काच्यो सांगो 200 ते 300 रुपया कील ह्या दरान मेळटाल्यो.