भांगरभूंय | प्रतिनिधी
आयसीएआर वैज्ञानीक डॉ. श्रीपाद भट्ट हांचें स्पश्टीकरण
पणजी : नाल्लाच्या पिकाक बाबत हवामानाचोय फटको बसला. अनेमीत पावस आनी शिंयाक लागून पीक उणें जाला. गोंयांतूच न्हय जाल्यार केरळ आनी कर्नाटकांत लेगीत नाल्लाचें उत्पादन उणें आसा, अशी म्हायती भारतीय कृशी संशोधन केंद्रातले वैज्ञानीक डॉ. श्रीपाद भट्ट हांणी दिली.
अंदूं पावस नेमान पडूंक ना. जून, जुलयांत तो चड पडलो. सप्टेंबरांत उणो जालो. शीं पडपाक सुरवात जाल्ली. मात आतां तापमान वाडपाक लागलां. अदीं मदीं दमट हवामान जाता. हाचो फटको नाल्लाच्या पिकाचेर जाला.
रानटी जनावरांचो उपद्रव तशेंच किडी लागपाचे प्रकार आसाच. भारतीय कृशी संशोधन केंद्र हवामान आनी पिकाचेर संशोधन करता. नाल्लाचें पीक उणें जावपाचो अदमास नोव्हेंबरांत लेगीत संशोधकांनी उक्तायलो. केरळांत मोठ्या नाल्लाचो दर 47 रुपया आसा. केरळ, कर्नाटक आनी तमीळनाडू ह्या राज्यांनी नाल्लाचें उत्पादन चड जाता. केरळ सावन लेगीत नाल्ल गोंयांत येता. हेर राज्यांनी नाल्लाचे उत्पादन देंविल्ल्यान गोंयांत येवपी नाल्लाचें प्रमाण उणें जालां. हें लेगीत दर वाडपा फाटलें एक कारण आसा, अशें तांणी सांगलें.
अंदूं गिमांत उश्णतायेचें ल्हार आयिल्लें. हाका लागून नाल्लाच्या झाडाचेर परिणाम जालो. तापमान वाड वा गरमी वाडली जाल्यार पिकाचेर परिणाम जाता.
कासरगोड हांगाच्या केंद्रीय शेती संशोधन संस्थेचें संचालक के. भालचंद्र हेब्बर हांणी हाचेर संशोधन केलां. अंदूं गोंया सयत कर्नाटक, केरळ, तमीळनाडू राज्यात हवामानाचो फटको नाल्लाक बसला, असो तांचो निश्कर्श आसा, अशी म्हायती वैज्ञानीक डॉ. श्रीपाद भट्ट हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
