भांगरभूंय | प्रतिनिधी
पणजी: नार्कोटीक कंट्रोल ब्युरोचे गोंय आनी मुंबय विभागाच्या क्षेत्रीय संचालका आड तेन्नाच्या गुप्तचर अधिकार्यांनी भ्रश्टाचाराचो आरोप करून एनसीबीच्या मुख्यालया कडेन कागाळ केल्या. तिच्या आदाराचेर ब्युरोच्या केंद्रीय दक्षता विभागान चवकशी सुरू केल्या.
मुखार आयिल्ले म्हायती प्रमाण, ही कागाळ एनसीबीचे तेन्नाचे गुप्तचर अधिकारी राजेश कुमार यादव हांणी दाखल केल्या. नार्कोटीक ब्युरोचे संचालक अमित घावटे (आयआरएस) हांच्या देशभरांतल्या खाजगी वा अधिकृत दौर्या वेळार एके फार्मा कंपनीन तांकां रावपाची, वाहन आनी हेर वेवस्था उपलब्ध करून दिल्ली. हे कंपनीन घावटे हांच्या पुणे आनी दिल्लींतल्या रावपा वांगडा वाहनांची वेवस्था केली. हे कंपनी कडल्यान घावटे हांकां दर तीन म्हयन्यांत कांय थारावीक रक्कमूय मेळ्ळी, अशी कागाळ यादव हांणी केल्या. ही कंपनी नार्कोटीक कंट्रोल ब्युरो कडेन नोंद आसा.
मजगतीं, हैद्राबादांतल्या प्रतिनियुक्तीच्या काळांत घावटे हांचे आड नोंद जाल्ली एक दक्षता चवकशी आजून आडकून आसा.
फायव्ह स्टार हॉटेलांत रावपाचो आनी वाहन शुल्काचो खर्च घावटे सदांच रोख रकमे वरवीं करताले. तांणी वरीश्ठ अधिकारी आनी तांच्या कुटूंबियां वांगडा अनौपचारीक टुराची सदांच अज्ञात स्रोतां वरवीं वेवस्था केली आनी हे खातीर येवपी खर्च रोख रक्कमेन दिला. ताका लागून कागाळीं प्रमाण चवकशी करून हें प्रकरण सोडोवपाची मागणी राजेशकुमार यादव हांणी केल्या. हे कागाळींनी दखल घेवन एनसीबीच्या केंद्रीय दक्षता विभागाचे उपमहासंचालक निरज कुमार गुप्ता हांणी चवकशी सुरू केल्या. तशेंच हे कागाळीची पडताळणी करपा खातीर कागाळदाराक चवकशेक हाजीर रावपाक समन्स जारी केला.
घावटे हांचो दावो
मजगतीं, कागाळदार अधिकारी इंदूर मध्यप्रदेश हांगा बायले सयत सेवा दिताले. तेन्ना ह्या विभागाचो ताबो आशिल्ल्यान संबंधीता आड कर्तव्य करतना चुकिल्ल्याचो अहवाल धाडिल्लो. ह्या एसीआराक लागूनच तांची बडटी आडकली आनी सूड घेवपाचे भावनेने यादव हांणी आपले आड ही कागाळ केल्या आसतली. तशेंच आपल्याक आजूनय चवकशेक आपोवंक ना. तशेंच ह्या अधिकार्यान केन्नाच मुंबय सेवा दिवंक ना, असो दावो अमित घावटे हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
