नारीशक्त जिखतली?

भांगरभूंय | प्रतिनिधी

गोंयचीं बायलां पंचायत, पालिका, जिल्हो पंचायतींनी दादल्यांच्या खांदाक खांद लावन वावुरतात. तीं सुशिक्षीत आसात. म्हणटकच….

लोकसभा वेंचणुकेची तारीख खंयच्याय खिणाक जाहीर जावपाक शकता. सध्या देशभरांत राजकी पक्ष आपापले उमेदवार जाहीर करपाचे गडबडींत लागल्यात. कांय आडवाद सोडल्यार अजून भोवतेक कडेन उमेदवार थारपाचे आसात. हो काळ युतीच्या राजकारणाचो आशिल्ल्यान अमूक जाग्यार नेमकी कोणाक तिकेट दिवची, हाचेर कांय कडेन अजून भासाभास, वाटाघाटी चल्ल्यात. तातूंत भाजपान 195 उमेदवारांची आपली पयली वळेरी जाहीर केली. उत्तर गोंयांत श्रीपाद नायक हांकां फाटोफाट सवे खेपे उमेदवारी मेळ्ळ्या. हे खेपे वेंचून येत जाल्यार सगल्यांत चड काळ खासदारपद सांबाळपाचो विक्रम तांच्या नांवार जातलो. पूण सगल्या गोंयकारांक ताचे परस चड उमळशीक लागल्या ती दक्षीण गोंयांत भाजपाची तिकेट कोणाक मेळटली ताची. चंद्रकांत कवळेंकार, अॅड. नरेंद्र सावयकार, दामू नायक हांचीं नांवां मुखार आशिल्लीं. पूण अचकीत बायल उमेदवाराक तिकेट दिवपाची दिल्लीच्यान सुचोवणी आयली आनी…. आतां भाजपा मुख्यालयांत बऱ्याच बायल फुडाऱ्यांचे अर्ज दाखल जाल्यात. सध्या मुख्यमंत्री सावंत हांची घरकान्न प्रा. सुलक्षणा सावंत हांचे सयत सुवर्णा प्रभू तेंडुलकार, विद्या गावडे, शेफाली वैद्य, डाॅ. स्नेहा भागवत, सविता तवडकार हांचे सयत आनीक कितलींशींच नांवां मुखार आयल्यांत. हांचे मदल्या कोणाक उमेदवारी मेळटा, तें कळटलेंच. जर बायल उमेदवाराकूच उबी केली जाल्यार ती नोंद घे सारकी घडणूक थारतली. कारण लोकसभा वेंचणूक गोंयांतली बायल जिखूंक ना. आडवाद मगोची संयोगीता राणे. तांकां 1980 त जैत मेळिल्लें. म्हणल्यार भाजपाची उमेदवार जर जिखून आयली जाल्यार ती इतिहासीक घडणूक थारतली. 44 वर्सां उपरांत गोंयाक बायल खासदार मेळटली. मात, ही उमेदवारी भाजपा खातीर बरींच वर्सां काम केल्ले, भाजपा विचारसरणे कडेन लागीं आशिल्लेकूच मेळटली. उमेदवार वेंचपाचो निर्णय दिल्लींत भाजपा संसदीय मंडळ घेतलें, म्हणटकच ते आदल्या तीन उमेदवारां मदल्या एकल्याक वेंचून काडटात काय बायल लोकप्रतिनिधीं मदल्या कोणाक संद दिता, तें कळटलें. घडये महिला दिनाक बायल उमेदवाराच्या नांवाची घोशणा जावं येता.
काँग्रेस आनी आम आदमी पक्षान हे वेंचणुके खातीर युती केल्या. 2019 चे वेंचणुकेंत काँग्रेसीचे फ्रान्सीस सार्दीन हांकां 2,01,561 तर भाजपाच्या नरेंद्र सावयकार हांकां 1,91,806 मतां मेळिल्लीं. आपाच्या एल्वीस गोम्स हांकां 20,891 मतां. हे खेपे आपा कडेन दक्षिणेंत दोन विधानसभा मतदारसंघ आसात. पूण, जाणकारांच्या मतान रिव्होल्युशनरी गोवन्साचे कामगिरीचेर द. गोंयचो निकाल थारतलो. ते जितले चड मतां घेतात, तितलो भाजपाक फायदो जातलो. कारण तांचे चडशे मतदार काँग्रेसीचे. खुद्द काँग्रेसीच्याच कांय फुडाऱ्यांनी हें जाहीर उलोवन दाखयलां. फाटल्या कांय वर्सांनी ह्या पक्षान स्वताचे मतदार तयार केल्यात. तांचो एक आमदारूय आसा. द. गोंयांत 3.20 लाख बायल मतदार, तर दादले मतदार 3.01 लाख. म्हणटकच बायलांनी पक्ष कुशीक दवरून मतदान केलें जाल्यार बायल उमेदवार जिखप तशें कठीण न्हय. कांय आडवाद सोडल्यार घरांत राजकी फाटभूंय आशिल्ल्यो बायलोच आमदार जाल्यात. भाजपान बायलांक 33 टक्के राजकी आरक्षण दिवपाचेंय घोशीत केलां. लोकसभा वेंचणुके वरवीं ताची सुरवात जावं येता. गोंयची बायलां पंचायत, पालिका, जिल्हो पंचायतींनी दादल्यांच्या खांदाक खांद लावन वावुरतात. तीं सुशिक्षीत आसात. म्हणटकच लोकसभा, राज्यसभा, विधानसभेंत स्वताचें कर्तृत्व दाखोवप तांचे खातीर तशें कठीण न्हय. सुरवातेक तांचे घोव स्वराज्य संस्थांच्या कारभारांत लुडबूड करताले. मात आतां बरींच बायलां स्वतंत्रपणान पंच, सरपंच, नगरसेवक पद हाताळटात. बरें काम करतात.
उत्तर गोंयांत श्रीपाद नायक हांकां अपक्षे प्रमाण भाजपान तिकेट दिल्या. तांचे आडूय तशीं 2- 3 नांवां मुखार आयिल्लीं. पूण पक्षश्रेश्ठींनी तांचेर विस्वास दवरलो. कांय जाणांच्या मतान, ते दोळे धांपून, आदल्या परस चड मतांनी वेंचून येतले. पूण थोड्यांक काँग्रेसीन पेजाद उमेदवार दवरलो जाल्यार ही वेंचणूक श्रीपाद नायक हांकां जड वचूं येता, अशें दिसता. आप आनी रिव्होल्युशनरी गोवन्साचीय भुमिका हांगा म्हत्वाची थारतली. 2019 चे वेंचणुकेंत श्रीपाद नायक हांकां 244,844 मतां मेळिल्लीं, तर काँग्रेसीच्या गिरीश चोडणकार हांकां 1,64,597, तर आपाचे दत्तात्रेय पाडगांवकार हांकां 4,756. हे खेपे श्रीपाद नायक वेंचून येवपाचो विक्रम करतात काय नात, ताची उमळशीक राजकी जाणकारांक आसतलीच.
भाजपान प्रत्येक वेंचणुकेंत धाडसी निर्णय घेतल्यात. हे खेपे आदल्या बऱ्याच खासदारांक तिकेट दिवंक ना. दक्षीण गोंयांक तर ते बायल उमेदवार दवरपाक सोदतात. तांच्या ह्या डावपेचांक कितलें येश मेळटलें, हें निकाला दिसाच स्पश्ट जातलें.