भांगरभूंय | प्रतिनिधी
न्यायालयांत वचातः तानावडे; न्यायालय तुमच्या बोल्सांत आसा व्हय?: पाटकार
भांगरभूंय । प्रतिनिधी
पणजीः काँग्रेस फुडारी राहूल गांधी हांणी नारीशक्ती संबंदांत मुंबयचे सभेंत केल्ल्या विधाना वयल्यान भाजप प्रदेशाध्यक्ष सदानंद शेट तानावडे आनी काँग्रेस प्रदेशाध्यक्ष अमीत पाटकार हांचे मदीं शुक्रारां पेटलें. आपूण आपले भुमिकेचेर ठाम आसा, पाटकार न्यायालयांत गेले जाल्यार आपूण वचपाक तयार आसा, अशें तानावडे हांणी म्हणले उपरांत न्यायालय तुमच्या बोल्सांत आसा काय कितें, असो प्रस्न पाटकार हांणी उपस्थीत केलो.
कांय दिसां आदींच इंडिया आघाडीचे मुंबय जाल्ले सभेंत उलयतना राहूल गांधी हांणी नारीशक्तीचो अपमान केल्ल्याचो दावो करून, सदानंद शेट तानावडे हांणी काँग्रेस आनी राहूल गांधी हांचो निशेध नोंद केलो. ताचे वयल्यान आक्रमक जाल्ल्या अमीत पाटकार हांणी तानावडे हांचेर बोट दवरून ताचे आड वेंचणूक आयोग तशेंच पुलिशेंत कागाळ दाखल केली आनी तानावडे हांचे आड तत्काळ कारवाय करपाची मागणी केली.
ह्या विशयाचेर परतून भाश्य करतना तानावडे हांणी शुक्रारा अमीत पाटकार हांकां जाहीर आव्हान दिलें. राहूल गांधी विशीं आपूण जें उलयलां, ताचेर अजून लेगीत ठाम आसा. हे संबंदांत पाटकार न्यायालयांत गेले आनी आपल्याक न्यायालयान आपयलो जाल्यार आपली थंय वचपाची तयारी आसा, अशें तांणी नमूद केलें.
मजगतीं, शुक्रारा पणजे घेतिल्ले पत्रकार परिशदेंत पत्रकारांनी हे विशीं पाटकार हांकां विचारलें. त्या वेळार तांणी सांगलें, आमी तानावडे आड वेंचणूक आयोग आनी पणजी पुलीस स्टेशनार कागाळ दाखल केल्या. तांचे कडल्यान कारवाय जाली ना जाल्यार आमी निश्चीत न्यायालयांत वतले. तानावडे आपल्याक न्यायालयांत वचपाचो सल्लो दिता. म्हणल्यार न्यायालय ताका आपल्या बोल्सांत आसा, अशें बी ताका सांगपाचें आसा कांय कितें, असोय प्रस्न तांणी ह्या वेळार उपस्थीत केलो.
‘मंत्रीमंडळांत मुख्यमंत्री सोडून सगळे काँग्रेसीचेच’
प्रदेशाध्यक्ष अमीत पाटकार हांणी काँग्रेसीच्या चाळिसूय गटाध्यक्षांचीं नांवां चुकनासतना सांगून दाखोवचीं. ना जाल्यार आपूण भाजपाच्या सगळ्या गटाध्यक्षांची नांवां सांगतां, अशें आव्हान तानावडे हांणी अमीत पाटकार हांकां दिल्लें. ताचेर उलयतना पाटकार हांणी सांगलें, तानावडे हांणी आपल्या चार कार्यकर्त्यांचीं नांवां सांगचीं. तांच्या सरकाराच्या मंत्रीमंडळांत मुख्यमंत्री डॉ. प्रमोद सावंत सोडून हेर सगळे काँग्रेसीचेच आसात, असोय थोमणो तांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
