भांगरभूंय | प्रतिनिधी
अखेरेक 27 वर्सांनी कांय जायना केंद्रीय मंत्रीमंडळान बायलां आरक्षण विधेयकाक मंजुरी दिल्या. नारीशक्ती वंदन अधिनियम अशें ताचें नांव. हें विधेयक संसद एकमतान मानून घेतली अशें सगल्यांकूच दिसता. कारण भाजपा आनी काँग्रेस सयत भोवतेक पक्ष ताचे वटेन आसात. मात, तें योग्य पद्दतीन चालीक लागप तितलेंच म्हत्वाचें. कारण बायलांक भारतीय समाजान कायम दुय्यम स्थान दिलां. कांय जाण तर आयज पसून बायलेन फक्त घर, चूल आनी मूल इतलेंच सांबाळचें, अशें प्रामाणीकपणान मानतात. बायलांक उच्च शिक्षण, नोकरीय करपाक तांची मानसिकताय परवानगी दिना.
बायलां आरक्षण विधेयक सगल्यांत पयलीं संसदेंत हाडलें तें एच. डी. देवेगौडा सरकारान. 1996 त. मागीर 1997 त इंद्रकुमार गुजराल सरकार आनी 1998 त अटलबिहारी वाजपेयी सरकारान. मात तिनूय फावट तें मंजूर जावंक ना. वाजपेयी सरकार 1999 त सत्तेर येतकच विधेयक परतून हाडलें. 2010 वर्सां डाॅ. मनमोहन सिंग सरकाराक तें राज्यसभेंत मंजूर करपाक येश मेळ्ळें. पूण लोकसभे मेरेन तें आयलें ना. आतां नरेंद्र मोदी हांच्या एनडीए सरकार तें हाडलां. निदान आतां तरी तें दोनूय सभाघरां मानून घेतलें, अशी आस्त. आनी देशांतल्यो 50 टक्के विधानसभाय!!
हें विधेयक कायदो जातलें, तेन्ना लोकसभा आनी सगल्या विधानसभांनी बायलांक एक तृतियांश जागे मेळटले. गोंयांत 13 जागे. लोकसभेच्या 543 जाग्यांतले 181 बायलांक राखीव जातले. अनुसूचित जातीं खातीर सध्या 84 जागे आसात, जमातीं खातीर 47 जागे आसात. तातूंतले 33- 33 टक्के बायलांक दिवचे पडटले. लोकसभा, विधानसभांनी जनरल जागे आसात, थंयूय बायलांक उबें रावपाक मेळटलेंच.
आयज पंचायत, नगरपालिका, जिल्हो परिशदांनी जायत्यो बायलो आसात. बरे तरेन प्रशासन, स्वराज्य संस्था चलयतात. मात, पुरुशप्रधान समाजाची मानसिकताय तांकां स्वतंत्रपणान काम करूंक दिताच अशें ना. तांकां कितें जमता, अशें सगल्यांकूच दिसता. देखून तांच्या कारभारांत तोंड घालपाचे प्रकार जाता….. आनी हे राजकारणांत आशिल्ले तांचे बापूय, घोव, भाव वा घरचे हेर दादलेच करतात. पक्षांचे वरिश्ठ फुडारी, लोकप्रतिनिधींच्या मना प्रमाण तांकां वागचें पडटात. कांय कडेन तांचो गैरफायदो घेवपाचोय यत्न जाता. तशे गंभीर आरोप देशांतल्या जायत्या लोकप्रतिनिधींचेर जाल्यात. अर्थांत हाचो अर्थ सगल्योच बायलो दुसऱ्यांच्या पोशान उदक पियेवपी, असो कोणे घेवचो न्हय. देशांत खमक्यो, धाडसी बायल फुडारी जावन गेल्यात, आतांय आसात. आपल्या कर्तृत्त्वान तांणी हें सिद्ध केलां. नांवां घेवचींच जाल्यार इंदिरा गांधी, ममता बॅनर्जी, सुषमा स्वराज, जयललिता, मायावती….! गोंयांत शशिकला काकोडकार, व्हिक्टोरिया फर्नांडीस….! आयज दादल्यांच्या खांदाक खांद लावन बायलो स्वतंत्रपणान वावुरतात, तश्यो राजकारणांतूय आसच्यो. तांच्या पांयांत दृश्य- अदृश्य बेडयो दिसच्यो न्हय. तांचें निर्णय तांकां मेकळेपणान घेवंक मेळचे.
सध्याक राजकारणांत ज्यो बायलो आसात, त्यो खांप्या राजकी फुडाऱ्यांच्यो बायलो वा लागींच्यो सोयऱ्यो आसात. दादलो फुडाऱ्याच्या कर्तृत्त्वाक लागून त्यो जिखून आयल्यात, अशें म्हणल्यार कोणे तिडकूचें न्हय. दादलो फुडारी आमचीं कामां करता, म्हणटकच ताणें उबी केल्ले बायलेक मतां दिवप हें आमचें कर्तव्य अशें मानपी कोट्यांनी मतदार आमच्या देशांत आसात. वैयक्तीक कामगिरीच्या आदारान बायल फुडारी जिखून येवपाक जाय. चली, घरकान्न, पक्षाची वावुरपी हे निकश हाचे मुखार नाकात. बायलांनीय ह्यो कुबड्यो, धिगयो पयस मोखून मारच्यो! सध्या 78 बायलो खासदार आसात, तातूंतल्यो 32 व्हडल्या फुडाऱ्यांच्यो बायलो, धुवो आसात.
बायलांक 33 टक्के आरक्षण दिवपी हें विधेयक 2024 चेर लोकसभा वेंचणुकेक लागू जातलें कांय ना, हो प्रस्न आसा. विरोधकांच्या मतान 2029 चे लोकसभा वेंचणुके वेळार तें चालीक लागतलें. फक्त 2024 चो लोकसभा वेंचणूक प्रचार नदरे मुखार दवरून हें विधेयक हाडलां, अशेंय तांकां दिसता. कितेंय आसलें तरी तें चालीक लावपाक खूब धाडस करचें पडटलें. गोंयांत पांच मतदारसंघ राखीव जाय म्हणपी अनुसूचीत जमाती संघटनांक ते खातीर संघर्श करचो पडटा. 13 मतदारसंघ बायलां खातीर राखीव दिवपाचें थारलें काय पयलीं अस्वस्थ जातले ते थंयचे प्रस्थापीत राजकी फुडारी. ते घरकान्नींक वा पक्ष वावुरप्यांक मुखार काडून मंत्रीपदाचेर आपलें पुराय वर्चस्व उरतलें, हाचो यत्न करतलेच. मागीर हातूंत महिला सशक्तीकरण खंय आयलें?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
