भांगरभूंय | प्रतिनिधी
बंगळुर, खबरां संस्था : भारताची एकंदर उत्पादकताय वाडोवपाक तरणाट्यांक “सप्तकांतल्यान 70 वरां” काम करपाक जाय, अशें इन्फोसिसचे सहसंस्थापक नारायण मूर्ती हांणी सुचयले उपरांत वाद सुरू जाला. मूर्तीच्या ह्या सूत्राचेर सोशल मिडिया तज्ञ आनी हेर जायत्या जाणांनी प्रतिक्रिया दिल्या. अशा नित्यनेमाक लागून काळजा संबंदीत समस्या आनी ताण संबंदीत त्रास जावंक शकतात हाचेर कांय जाणांनी भर दिला. नारायण मूर्तीच्या विधाना उपरांत सोशल मिडियाचेर वाद निर्माण जाल्ल्यान एका खबरां चॅनलान नारायण मूर्ती हांची घरकान्न आनी लेखिका सुधा हांचे कडेन खाशेले उलोवप केलें.
हालींच जाल्ल्या 14 व्या टाटा लिट फेस्टांत लेखिका म्हणून मुंबयक भेट दिवपी सुधा हांणी आयतारा नॅशनल सेंटर फॉर परफॉर्मिंग आर्ट्सांत (एनसीपीए) चर्चासत्र घडोवन हाडले. सुधा मूर्तीन जायत्या विशयांचेर विचार मांडले. नारायण मूर्ती कडेन आपल्या जिविता विशीं उलयतना सुधा हांणी सांगलें, आपलो घोव आवड आनी खऱ्या कश्टाचेर विस्वास दवरता. सध्याच्या सप्तकातल्यान ७० वरां काम करपाच्या वादाचेर तिणें सांगलें, तांणे सप्तकांतल्यान ८० ते ९० वरां काम केलां, देखून त्या परस कितली उणी वरां काम करतात तें तांकां कळना. खऱ्या कश्टाचेर ते विस्वास दवरता आनी ताचे प्रमाण ते जियेल्यात. देखून तांका जें दिसलें तें तांणी सांगलां. “लोकांची भावना उक्तावपाची पद्दत वेगवेगळी आसता. पूण ते तशेंच जियेताले आनी उलयताले. देखून ताणें आपलो अणभव सांगलो,” अशेंय सुधा मूर्ती हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
