भांगरभूंय | प्रतिनिधी
बाणस्तारीचो भिरांकूळ अपघात जावन कांय दीस जातात थंय आसात, पर्वरे पयर रातीं अपघात जालो. तातूंत गाडयेंतल्या तिगांक मरण आयलें. गाडी चलोवपी, ताचो भावोजी, मावस भयण हांकां मरण आयलें. तर तांच्या कुटुंबांतलीं दोगां जाणां गंभीर जखमी जाल्यांत. मेरशे रक्षाबंधनाक वचून म्हापशेंचे दिशेन येतना रातचो देडांक हो अपघात जालो. अर्थांत गाडी खूब वेगान आसूंक जाय. घरा बेगीन पावपाक जाय म्हूण घडये ताकतीक आसतली वा गाडी चलोवप्याक रात जाल्ल्यान लकणी आयल्या आसतली. पुलीस तपासा उपरांत सत कितें तें भायर येतलेंच. पूण जालें तें वायट जालें. गोंयांत दिसाक दोन तरी व्हडले अपघात पुलिशेंत नोंद जातात. किरकोळ अपघातांचें कोंत आनी हिशोब ना. पुलिशेन सादूर रावपाक जाय, पूण ताचे परस गाडी चलोवपी आनी रस्त्या कुशीकच्यान चलप वचप्यांनी चड जतनाय घेवपाक जाय. कारण सध्या गोंयांत सकाळीं भायर सरिल्लो सांजवेळा सुखरुप घरा परत येतलो, हाची खात्री कोणूच दिवंक शकना, इतले अपघात वाडल्यात.
दरेकल्या कडेन गाडी आसा, कांय जाण नेम पाळीनात, थोडे नशेंत गाडी चलयतात, कांय जागरणां करून, थोडे ओगीच वेगान वतात, थोडे ट्रॅफिक जामाक विटून संद मेळ्ळी काय विमान पायलटूच जातात, रस्ते इबाडल्यात, रस्त्यार काळोख, गोरवां, पार्क केल्ल्यो गाडयो आसतात……..! तातूंत आनीक एक गजाल अपघातांक कारण थारल्या ती म्हणल्यार नायट लायफ!! पर्यटनमळ दिसा परस रातचेंच चड जागें आसता, अशें म्हणल्यार अतिताय थारची ना. पूण ताचेय परस चड जाणवपी गजाल म्हणल्यार हालींच्या कांय वर्सांनी बाजारा पसून बारशा मेरेन सगलेंच रातचें जावपाक लागलां. पयलीं बाजार सकाळींच जातालो. आतांय जाता, पूण बरेच लोक सांजवेळा साता उपरांत खरेदीक वतात. पार्टेक (चड करून ओली) वचपीय वाडल्यात. रातची जेवपाक वचपी कुटुंबां आसात. तातूंत चडश्यो घरगुती कार्यावळी आतां रातच्योच दवरतात. मागीर तो बारसो, वाडदीस, लग्नाचें रिसेप्शन, फुलां आसूं वा हळडीकुकूम. ताका लागून रातचें गाडी घेवन भोंवप जाता आनी मागीर अपघाताची भिरांत आसता. दर्यावेळांचेर, पबांनी रातच्या वेळार वतकच मध्यान रातीं मेरेन थोडी थोडी पिया करो म्हणटा म्हणटा आपूण उफेवंक केन्ना लागलो तें स्वताकूच कळना…. आनी मागीर रातचो घरा येतना कितेंय जावं येता. ह्या प्रसंगार संबंदितांनी आपूण गाडी चलोवपाचो आसा, हाचें भान दवरूंक नाका?
कांय रस्त्यांचेर काळोख आसता, गोरवां बशिल्लीं आसतात. फोंडकुलां, रंग गेल्ले स्पीडब्रेकर आसात. सवकास चलोवप्याकूय हें धोक्याचें. वीज, बांदकाम आनी येरादारी खात्यान एकठांय बसून हाचेर बेगीन उपाय घेवपाचो वेळ आयला. खास करून रस्ते खणपाचे बाबतींत सरकारी खात्यां मदीं समन्वय ना. एकल्याचें काम जालें काय दुसरो कामाक हात घालता आनी रस्तो परतून खणून उस्तिता. विकासाच्या नांवा खाला हें कितलीं वर्सां सोंसपाचें?
थळाव्या स्वराज्य संस्थांनी आडमेळ्यांचे राशींत आपली म्हूण वेगळी भर घाल्या. खंयच्याय रस्त्याचेर वचात, पंचायतींनी रस्त्याक तेंकूनच दुकानांक परवानगी दिल्या. थंय गिरायक गेलें आनी ताणें रस्त्याचे कुशीक मोटार उबी केल्यार कितें जातलें, तें वेगळें सांगपाक नाका. तातूंत फळां, नुस्तें, भाजी, कपडे विकपी… आतां सगलेच रस्त्या कुशीक बसपाक लागल्यात. तांचे खातीर शेड बांदपाची घोशणा जाल्ली. ती जाता तेन्ना जाता. विकप्यांचो रागरंग पळयल्यार ते थंय बसपाक तयार जातले, अशें दिसना. हो रस्त्या कुशीचो बाजार अपघाताचें व्हडलें कारण. राज्यांतले हे अपघात आडावप आतां हाता भायर गेलां अशें दिसता. वयर म्हणलां ते प्रमाण, गाडी चलोवप्यांचेर चड जापसालदारकी येता. अपघात जावन कितलेशेच दिव्यांग जाल्यात. तांचे कडेनूय सरकारान लक्ष दिवंक जाय. दिव्यांगा खातीर समाजकल्याण खातें खूब कितें करता. तशेंच अपघात पिडेस्तां खातीरुय पावलां उखलचीं.
राज्या खातीर नायट टुरिझम गरजेचें, अशें जायत्या जाणांक दिसता. गोंयची अर्थवेवस्था सुदारतलो जाल्यार तें जाय, पूण तें चालीक लायतना आपणे आपल्याच पांयार फातर मारून घेवपा सारकी स्थिती जावंक फावना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
