भांगरभूंय | प्रतिनिधी
पर्यटन मळा खातीर देशांतलो सगल्यांत अनुकूल असो काळ आसा हाची जाण आसतनाय हें सगलें घडटा हें हुस्को करपा सारकें आसा.
नायट क्लबाच्या नांवा खाला गोंयांत आनी देशांत आनी हेर खूबशे कडेन उबें राविल्लें ‘मृत्युगोल’ आसूं वा विमान प्रवाशांची खुबश्या विमानतळांचेर फाटले धा-पंदरा दीस जाले, लोक जे त्रास काडटात ताचीच मुखेलपणान सद्या देशभर चर्चा जातना दिसून येता. उत्तर गोंयांतल्या हडफडें हांगासरल्या नायट क्लबाक लागिल्लो उजो आनी त्या उज्यांत 25 जाणांक आयिल्लें मरण हाका लागून आमचें गोंय नाका त्या कारणांक लागून परतून एकदां राष्ट्रीय चर्चेचो विशय जाला. म्हणल्यार गोंय आतां खऱ्या अर्थान राष्ट्रीय प्रवाहांत पुरायपणान एकरूप जालां अशेंच म्हणचें पडटलें. ल्हानशा सैमान नटिल्ल्या गोंयांत अशी दुर्दैवी घडणूक आयजवेर केन्नाच घडूंक नाशिल्ली. आतां गोंयांत तशें घडपाचेंय कितें उरलां अशें कोणूच म्हणूंक शकचो ना. खेटाखेटींत बळी वचपाची घडणूक आमी अणभवली. व्हड व्हड दरोडेय हांगा पडूंक लागल्यात. विद्यार्थ्यांची आत्महत्याय नेमान वाचूंक मेळटात. रस्त्यां वेल्या अपघातांत दीसपट्टे लोक मरतात तें पळयत जाल्यार आमी नवो विक्रम बी करपाक वचनात मूं अशेंच दिसता. घुंवळे वखदां मदींय गोंय फाटीं ना. मागीर आतां उरलें कितें असो प्रस्न कोणेय विचारप सभावीक आसा. हडफड्यां नायट क्लबांतल्या उज्याचे घडणुके उपरांत ताका जापसालदार आशिल्ल्यांचेर खर कारवाय करतात. धनी लुथरा भावांक थायलॅण्डांतल्यान हाडटात. अशा बेकायदो क्लबांक कुलप मारतात ही गजाल बरी आसली तरी मुळांत हें सगलें बिनधास्तपणान चालू कशें जाता ह्या प्रस्नांची जाप मात मेळना.
हडफड्यां ज्या नायट क्लबाक उजो लागलो तो क्लब आशिल्लो काय ‘मृत्युगोल’ हो प्रस्न आतां विचारचोसो दिसता. ‘वेल ऑफ डेथ’ जाका म्हणटात तशे खूबशे ‘मृत्युगोल’ जाग्या जाग्यांनी उबे आशिल्ल्याचे आतां धडक कारवाये उपरांत उक्तडार आयलां. अशे ‘मृत्युगोल’ गोंयच्या पर्यटन मळा खातीर घातक थारूंक शकतले हें लक्षांत घेवन ते उद्धवस्त करपूच शाणेंपणाचें आसा हें आनी सांगपाची गरज आसा अशें दिसना. नव्या वर्साच्या येवकारा खातीर आमी सगलेच तयार जायत आसतना अशी घडणूक घडप हें दुर्दैवी आसा आनी ताचें आमकां कशें आनी कितलें मोल मेजचें पडत हें आयज सांगूंक येवचें ना. ते खातीर अजून कांय दीस रावचें पडटलें. कळंगूट- बागा वाठारांत नव्या वर्साच्या येवकारा खातीर दरवर्सा प्रमाण अंदूंय पर्यटक व्हड संख्येन गर्दी करतले अशी आस्त आमी बाळगून रावुया. पूण हाचो अर्थ असो न्हय की पर्यटनाच्या नांवा खाला आमी कितेंय करपाक मेकळे आसात. हडफडेंच्या ‘मृत्युगोल’ प्रकरणा पसून आमी कितेंय धडो घेतले काय ना हो खरो प्रस्न आसा. नव्या वर्साक मुखार वच्चे आदीं पर्यटन मळा कडेन संबंदीत आनीक एक संकश्ट मुखार उबें रावलां आनी तें इंडिगोच्या रुपान. फाटल्या धा-पंदरा दिसांत ताचोय फटको गोंयाक बसला हें न्हयकारूंक येवचें ना. पूण जितले बेगीन इंडिगोची हवाई येरादारी सेवा नेमान आनी सुरळीत चालू जातली ती गोंया खातीर निश्चीपणान बरी गजाल थारतली.
इंडिगो अॅरलायन्साच्या सेवांनी हालींच्या दिसांनी जी गंभीर अडचण निर्माण जाल्या ताका लागून फक्त लाखांनी हवाई प्रवाशांकूच त्रास सोंसचो पडला अशें न्हय, जाल्यार आंतरराष्ट्रीय पांवड्यार भारताची प्रतिमान म्हेळी जाली. देशांतली सगल्यांत व्हड खाजगी विमानसेवा कंपनी म्हूण इंडिगोची बाजारपेठेंतली हिस्सेदारी सुमार 65 टक्क्यां परस चड आसा. ताका लागून तिच्या कारभारांतलो त्रुटीचो परिणाम व्यापक आनी गंभीर थारता. फाटल्या कांय काळांत इंडिगोच्या उड्डाणां मदीं सेगीत कळाव, विमानां रद्द आनी वेवस्थापनांतलो गोंदळ दिसून आयलो. कांय प्रमाणांत परिस्थिती आतां सुदारिल्ली आसली तरी प्रवाशांक थाकाय मेळटली इतली सुदारणा जाल्ली ना. प्रवाशांची गैरसोय जालीच, गोंयची खूबशीं उड्डाणां रद्द जाल्ल्यान ताचो प्रतिकूल परिणाम जावप सभाविकूच आसा. एकूण विस्वासार्हताच घाताक हाडपा सारको हो प्रकार आसा. केंद्र सरकारान ह्या प्रकरणांत हस्तक्षेप करून चवकशीचे आदेश दिले हाका येवकारूच दिवंक जाय. पूण प्रस्न इतल्यान थांबना. खाजगी कंपनीं विशीं सरकाराची जापसालदारकी नेमकी कितली आनी कशी आसची, हो मुळावो प्रस्न हांगा उपस्थीत जाता. समस्या उप्रासचे पयलींच की ती गंभीर जाले उपरांत? चड करून जेन्ना एखादे कंपनीच्या निश्काळजीपणाचो फटको थेट लोकांक आनी देशाक बसता तेन्ना ही गजाल फक्त वेवसायीक उरनासतना राजकी जबाबदारीचीय थारता.
पर्यटन मळा खातीर देशांतलो सगल्यांत अनुकूल असो काळ आसा हाची जाण आसतनाय हें सगलें घडटा हें हुस्को करपा सारकें आसा. आयज गरज आसा ती स्पश्ट, खर आनी परिणामकारक जापसालदारकीची मानकां थारावपाची-राजकी, प्रशासकी आनी वेवसायीक अशा सगल्या पांवड्यार. नाजाल्यार एखादे कंपनीच्या निश्काळजीपणाक लागून निर्माण जावपी समस्या फक्त प्रवाशां पुरत्योच उरनासतना पुराय देशा खातीर तकलीफोड थारूंक शकतात. भारतीय अर्थवेवस्था गतीन मुखार वचत आसतना विमान येरादारी मळाची भुमिका चड म्हत्वाची थारपाची आसा. ताका लागून इंडिगोच्या आयच्या संकश्टांतल्यान धडो घेवन, फुडारांत अश्यो समस्या परतून उप्रासच्यो न्हय हे खातीर खर नेम, स्पश्ट जबाबदारी आनी वेळार हस्तक्षेप ही त्रिसुत्री चालीक लावप गरजेचें आसा. लोकांच्या हिताक सर्वोच्च प्राधान्य आसूंक जाय हाचो विचार जावंक जाय. इंडिगो प्रकरणांतल्यान हें स्पश्ट जाता की फक्त कायदे अस्तित्वांत आसप फावोशे ना. तांची प्रभावी अंमलबजावणी तितलीच म्हत्वाची आसा. नियामक संस्थांची भुमिका निर्णायक आसूंक जाय. कंपनीं नेमांक पाळो दितात काय ना, हाचेर सेगीत नदर दवरप गरजेचें आसा. खाजगीकरणाचो अर्थ असो जायना की सरकारान हात फाटीं घेवन मेकळें जावचें. उरफाटें ज्या क्षेत्रांचो थेट परिणाम सामान्य लोकांचेर आनी अर्थवेवस्थेचेर जाता थंय चड खर नेमांची गरज आसा. गोंयांतल्या हडफडें उज्याची घडणूक आसूं वा इंडिगो विमान कंपनीच्या मनमानींतलयान पर्यटनाचेंच न भरून येवपी लुकसाण जालां हें लक्षांत घेवन ताची पुनरावृत्ती जावंक न दिवपूच सगल्यांच्या फायद्याचें आसा.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
