नामनेचे मल्याळम अभिनेते मुकेश हांचेर शारिरीक अत्याचार केल्ल्याचो आरोप
भांगरभूंय | प्रतिनिधी
अभिनेत्री मीनू मुनीर हांणी फेसबूक पोस्टा वरवीं केलो आरोप
कोच्ची, खबरां संस्था: नामनेचे मल्याळम फिल्म अभिनेते आनी सीपीआय (एम) कोल्लमचे आमदार मुकेश एम. हांचे आड गुन्यांव दाखल केला. अभिनेत्री मीनू मुनीर हांणी पयलीं फेसबूक पोस्टा वरवीं फिल्माच्या सेटांचेर मुकेश आनी हेर 7 जाणांचेर शारिरीक अत्याचार केल्ल्याचो आरोप केलो आनी उपरांत केरळ पुलिशेंत लेखी कागाळ दाखल केली.
केरळ पुलिसांनी बिरेस्तारा भारतीय दंड संहितेच्या कलम 354 खाला 67 वर्सां पिरायेचो अभिनेतो आनी दक्षीण अभिनेतो जयसूर्या सयत हेर सात जाणांचेर गुन्यांव नोंद केला. मीनून आपल्या फेसबूक पोस्टांत ह्या सगळ्या आरोपींचो नांवान उल्लेख केला. मल्याळम फिल्म उद्देगांतल्या लैंगीक छळाच्या प्रकरणांची चवकशी करपा खातीर स्थापन केल्ली एसआयटी (खास तपास पंगड) ह्या प्रकरणाची चवकशी करतली.
मीनू मुनीर हांणी ‘एएनआय’ कडेन उलयतना सांगलें, एक दीस हांव बाथरूमांतल्यान भायर सरताली. मागीर जयसूर्या हांणे म्हाका फाटल्यान वेंग मारली आनी मागीर जबरदस्तीन चुंबन घेवपाक लागलो. कांय काळा उपरांत अभिनेतो इदावेलू बाबून म्हजे कडेन शारिरीक संबंद दवरपाची इत्सा उक्तायली.
हाचे आदीं मीनू मुनीरान आपल्या फेसबूक पोस्टांत 2013 वर्साचे घडणुकेचो उल्लेख करून फिल्माच्या सेटांचेर शारिरीक त्रास सोंसचे पडिल्ले अशें सांगिल्लें.
पयशां खातीर म्हाका ब्लॅकमेल करतालेः मुकेश
मीनूची पोस्ट व्हायरल जाले उपरांत मुकेशानय पोस्टा वरवीं स्पश्टीकरण दिलें. ताणें सांगलें, सत्य भायर येवंक जाय, कायदेशीर कारवाय करची पडटली. म्हजेर आनी त्या सगळ्या निर्मात्यांचेर जाल्ल्या आरोपांची चवकशी करपाक हांव येवकार दितां. ह्या प्रकरणाची नितळ आनी पारदर्शक चवकशी करपाची गरज आसा. कांय लोक म्हाका पयशां खातीर ब्लॅकमेल करताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
