भांगरभूंय | प्रतिनिधी
काणकोण: मूळ पणसुलें काणकोणचे आनी सद्या मुंबय माटुंगा हांगासरल्या रुहिया कॉलेजी कुशीक रावपी नामनेचे संवसारीक नाणें संग्रहक आनी वेवसायीक जायरात डिझायनर रघुवीर पै (87) हांकां काल सांजवेळा थोड्या तेंपाच्या दुयेंसान मुंबयंत मरण आयलें.
तांचे फाटल्यान पूत हेमंत, लग्न जाल्ली धूव द्वारका सागर म्हांब्रे, तशेंच संदेश, प्रसाद, वल्लभ, सर्वेश आनी छाया विजय पै खोत हांचे ते काका.
तांणी मुंबयंत वचून कमर्शियल आर्टिस्टाचे शिक्षण घेवन नामनेच्या कंपनीं खातीर जायरात करूंक लागले. रघुवीर पै मुंबयंत रावत आशिल्ल्यान गोंयकारा खातीर तांचो सदांच आदर आशिल्लो. तांचो जल्म 4 सप्टेंबर 1935 वर्सा जाल्लो. तांणी मुंबय हीच आपली कर्मभूंय मानिल्ली. पूण गोंयच्या आनी काणकोणच्या लोकांक तांणी मुंबयंत गेले उपरांत परक्याची वागणूक केन्नाच दिली ना.
तांणी सुमार पांच हजारां परस चड नाण्याचो संग्रह केल्लो. दुर्मीळ अशीं नाणीं तांणी सांबाळून दवरिल्लीं. गोंयच्या आनी काणकोणच्या लोकांक पळोवपा खातीर तांणी काणकोणां लेगीत प्रदर्शन भरयिल्लें. तांच्या ह्या योगदाना खातीर सारस्वत समाजा वतीन तेन्नाचे मुख्यमंत्री मनोहर पर्रीकार हांचे हस्तुकीं तांचो भोवमान केल्लो.
नाण्याचे अभ्यासक पद्मश्री म. के. ढवळीकार, आनी काणकोणकार ह्या संस्थांनी लेगीत तांचो भोवमान केल्लो. तांकां विवीध पुरस्कारूय फावो जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
