भांगरभूंय | प्रतिनिधी
- पिरायेच्या 90 व्या वर्सा घेतलो निमाणो स्वासमुंबय : नामनेचे चित्रपट निर्माते आनी दिग्दर्शक श्याम बेनेगल 23 डिसेंबराक सांजवेळा 6:38 वरांचेर संवसाराक अंततले. ताची पिराय 90 वर्सां आशिल्ली. मूत्रपिंडाचे त्रास सोंसपी बेनेगाल हांणी हालींच कांय दिसां आदीं आपलो 90वो वाडदीस 14 डिसेंबराक, आपल्या इश्ट आनी कुटुंबाच्या हाजिरेंत मनयलो. बेनेगलाच्या उल्लेखनीय योगदानांत ‘अंकुर’ आनी ‘निशांत’ हे चित्रपट आसात. 50 वर्सां परस चड काळ भारतीय सिनेमांत ते सक्रीय आशिल्ले.
मेळिल्ले म्हायती प्रमाण, श्याम बेनेगल हांणी सांजवेळा 6.38 वरांचेर मुंबयच्या वॉकहार्ट हॉस्पिटलांत निमाणो स्वास घेतलो. आयजय मंगळारा तांचे कुडीचेर निमाणे संस्कार जातलें.
भारतीय सिनेमांतल्या उल्लेखनीय योगदाना खातीर नामनां मेळिल्ल्या बेनेगल हांचे वचप भारतीय सिनेमाचें व्हड लुकसाण. समांतर सिनेमाचो आद्यप्रवर्तक बेनेगल हांणी मुखेल प्रवाहांतल्या सिनेमाच्या माध्यमांतल्यान तशेंच कला चित्रपटांच्या माध्यमांतल्यान वास्तववाद, खोलायेन अभ्यास आनी कथाकथनांत उत्कृश्ट कामगिरी केली. ताच्या वचपान भारतीय सिनेमांतलो एक युग सोंपता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
