नामनेची गायिका आशा भोसले अंतरली

भांगरभूंय | प्रतिनिधी

मुंबयः ज्येश्ठ गायिका आशा भोसले (92) संवसाराक अंतरली. तिका काळजाचो आताक आयिल्ल्यान काल उपचारा खातीर मुंबयच्या ब्रीच कॅण्डी हॉस्पिटलांत दाखल केल्ले.
भारत रत्न आनी ‘गानसम्राज्ञी’ लता मंगेशकार हांची धाकटी भयण आशा भोसले हांकां हिंदी फिल्म मळार वर्सटायल गायिका म्हणून वळखताले. स दशकां सावन तिणें आपल्या पदांक ह्या इंडस्ट्रींत आवाज दिला. तिणें फकत हिंदींतच न्हय तर मराठी, बंगाली, गुजराती, तमिळ, तेलुगू, कोंकणी ह्या सारक्या जायत्या भाशांनीय पदां गायल्यात. हिंदी फिल्म इंडस्ट्रीचे दिग्गज संगीतकार आरडी बर्मन, ओ पी नैय्यर, सचिन देव बर्मन, लक्ष्मीकांत-प्यारेलाल हांचे वांगडा तिणें जायतीं अजरामर पदां गायल्यांत. आशा भोसलेन ‘दम मारो दम’, ’ ‘रमैया वस्तावैया’, ‘ऐ मेरे हमसफर’, ‘ये मेरा दिल, दिल चिज है मेरी, अशीं जायतीं सुपरहिट पदां इंडस्ट्रीक दिल्यांत.
आशा भोसले ही भारतीय पलगायिका, उद्देजक. तिची हॉटेला आसात. तिच्या बहुमुखी प्रतिभा खातीर नामना मेळिल्ले तिचें वर्णन प्रसार माध्यमांनी हिंदी सिनेमांतली एक व्हड आनी प्रभावी गायिका अशें केल्लें. आठ दशकां परस चड काळांतल्या तिच्या कारकिर्दींत तिणें वेगवेगळ्या भारतीय भाशांनी चित्रपट आनी आल्बमां खातीर गितां रेकॉर्ड केल्यांत. आशा भोसले हांकां दोन राष्ट्रीय चित्रपट पुरस्कार, चार बीएफजेए पुरस्कार, अठरा महाराष्ट्र राज्य चित्रपट पुरस्कार, णव फिल्मफेयर पुरस्कार सयत एक लायफटायम अचीवमेंट पुरस्कार आनी विक्रमी सात फिल्मफेयर पुरस्कार, बेस्ट फीमेल प्लेबॅक गायिका खातीर अशे जायते पुरस्कार मेळ्ळ्यात. 2000 वर्सा सिनेमा मळार भारताचो सगळ्यांत व्हडलो पुरस्कार दादासाहेब फाळके पुरस्कार दिवन तिचो भोवमान जालो. 2008 वर्सा भारत सरकारान देशांतलो दुसरो सगळ्यांत व्हडलो नागरी मान पद्मविभूषण दिवन तिचो भोवमान केलो. गिनीज बुक ऑफ वर्ल्ड रेकॉर्डान तिका 2011 वर्सा संगीत इतिहासांतली सगळ्यांत चड रेकॉर्ड केल्ली कलाकार म्हूण मान्यताय दिली.

फाल्यां निमणे संस्कार
आशा भोसले हांचो पूत आनंद भोसले हांणी मिडिया मुखार आशा ताईंच्या मरणाची खबर दिली. तशेंच फाल्यां (सोमारा) सकाळीं 11 ते दनपारां 3 मेरेन आशा ताईंचे निमाणे दर्शन घेवपाक मेळटले. ते उपरांत तांची अंत्ययात्रा भायर सरतली आनी सांजेच्या 4 वरांचेर शिवाजी पार्कांतले मसणभुंयेंत निमाणे संस्कार जातले अशें सांगलें.