भांगरभूंय | प्रतिनिधी
वाळपयः रामलीला मैदान रायगडार 1 ते 3 जून ह्या काळांत राष्ट्रीय रामायण रामायण महोत्सव आयोजीत केला. ह्या महोत्सवांत सत्तरी म्हालांतल्या नानोडें बांबर रणमाले पंगडाची निवड जाल्या. हो पंगड 2 जूनाक आपलें सादरीकरण करतलो.
राम ओझरकार हांच्या फुडारपणा खाला हो पंगड हालींच रायगड वचपाक भायर सरला. दनपारां 2 वरांचेर महोत्सवाचें उक्तावण जातलें. उपरांत सामुहीक म्हापाठ, थळाव्या कलाकारां वतीन हनुमान चालिसा सादर जातली. 2.30 ते रातच्या 8.30 वरां मेरेन आयोजीत केल्ल्या ह्या महोत्सवांत झारखंड, महाराष्ट्र, मध्यप्रदेश, आसाम, ओडिशा, हिमाचल प्रदेश, गोंय छत्तीसगड ह्या राज्यांतली सांस्कृतीक पंगड सांस्कृतीक कला सादर करतले.
नानोडें बांबरचे राम ओझरकार हे उत्कृश्ट रणमाले कलाकार आसात. आतां मेरेन तांच्या फुडारपणा खाला रणमाले पंगडान देशाच्या साबार वाठारांनी कला सादरीकरण केलां. तशेंच सत्तरी म्हालांतल्या साबार वाठारांनी रणमाले पंगड तयार करचे खातीर तांणी व्हड योगदान दिलां.
रायगड गेल्ल्या पंगडांत राम ओझरकार, अशोक भाटेकार, अंकुश ओझरकार, अजीत हरवळकार, अमीत हरवळकार, उमेश कुडतरकार, शिवाजी ओझरकार, राम भाटेकार, मदन गांवकार, प्रज्योत म्हाळशेंकार, शिवदत्त हरवळकार, चंद्रकांत उस्तेकार, गोविंद गवळकार, नकुल गांवकार आनी श्रीविजय कोपर्डेंकार हांचो आस्पाव आसा.
हे संबंदांत आपली प्रतिक्रिया दितना रणमाले पंगडान गोंय सरकाराच्या कला आनी संस्कृती संचालनालयाचे उपकार मानल्यात. गोंयच्या सांस्कृतीक आनी परंपरीक कला संवर्धन करपाच्या दिश्टीकोनांतल्यान सरकार नेमान फाटबळ दिता. गांवगिऱ्या वाठारांतले कलेक संद मेळची आनी ही कला विकसीत जावची हे खातीर सरकारच्यो विवीध येवजण्यो आसात. तशेंच माची मेळोवन दिवचे खातीर सरकार नेमान आदार करता, हे खातीर राम ओझरेकार हांणी खोस उक्तायली.
अशेच तरेन गांवगिऱ्या वाठारांतल्या कलाकारांक संद दिली जाल्यार फुडारांत गोंयची सांस्कृतीक परंपरा विकसीत जावपाक आनीक मजत मेळटली. ह्या महोत्सवांत रणमालेचें उत्कृश्ट सादरीकरण करपाचो यत्न करतले, अशें राम ओझरेकार हांणी सांगलें.
रणमालेच्या संवर्धनाची जापसालदारकी तरणाट्यांची
रणमालेंत ज्येश्ठ कलाकारांचो मोलाचो वांटो आसा. आयज रणमालेचें संवर्धन करपाची व्हड जापसालदारकी तरणाट्यांच्या भुजार आसा. तातूंत दरेका गांवगिऱ्या वाठारांतल्या तरणाट्यांनी वांटो घेवचो आनी फुडारांत ही कला विकसीत तशेंच तिचें संवर्धन करचे खातीर योगदान दिवचें. सत्तरी म्हालाच्या साबार वाठारांनी आयज रणमाले पंगड तयार जातात, ही बरी गजाल. फुडारांत हे पंगड निश्चीत हे कलेक योग्य पद्दतीन वाट मेकळी करून दितले, अशें राम ओझरेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
