भांगरभूंय | प्रतिनिधी
अमृत सिंग हांणी दिली म्हायती
भांगरभूंय । प्रतिनिधी
दिवचलः नानाटी (रुका सोरोप) ह्या सोरपाचें शास्त्रीय तरेन अभ्यास करून ते प्रजातीचें मुल्यांकन करपाच्या दिश्टीकोनांतल्यान सुरतांतले दिकांश परमार आनी गोंयांतले प्राणीमित्र संघटणेचे अमृत सिंग हांकां येस मेळ्ळें.
नानाटी हो बिनविखाळी सोरोप गोंयांतल्या रानांनी तशेंच झाडां- पेडां आशिल्ल्या वाठारांत सांपडटा. 1827 त ह्या सोरपाची नोंद जाल्या आसली तरीय ताचो शास्त्रीय अभ्यास करपाचे नदरेन यत्न जावंक नाशिल्ल्यान ह्या सोरपा विशीं गैरसमज पातळयताले, अशी म्हायती अमृत सिंग हांणी पत्रकार परिशदेंत दिली.
कांमय अभ्यासकांनी हो सोरोप फक्त केरळ आनी दक्षीण भारतांत जाल्यार कांय जाणांनी महाराष्ट्रांत सांपडटा अशें म्हणिल्लें. जाल्यार कांय अभ्यासांत तो सर्वसामान्य सोरोप आशिल्ल्याचें स्पश्ट केल्लें. पूण आंतरराष्ट्रीय जैवविविधताय संशोधन पत्रिकेच्या नोव्हेंबर 2024 चे आवृत्तींत ह्या संशोधकांचो सोदनिबंध उजवाडाक आयिल्ल्यान ह्या सोरपाची निश्चीत प्रजाती मुल्यांकन करपाच्या दिश्टीकोनांतल्यान सगळ्या अभ्यासकांक संद मेळ्ळ्या, अशें अमृत सिंग हांणी सांगलें. आपल्याक ह्या अभ्यासांत संशोधकांनी वांटेकार करून घेतलो. गोंयांत सांपडिल्ल्या ह्या सोरपाच्या प्रजातीच्या संशोधनांत आपल्याचो आस्पाव करून घेतिल्ले खातीर तांणी सगळ्या शास्त्रज्ञांचे उपकार मानले.
नानाटी हो बिनविखाळी सोरोप. एकल्याक मारल्यार सात सोरोप येतात असो गैरसमज समाजांत आसा. हो सोरोप गोंयांत मेळ्ळा आनी हेर सोरपांच्या अधिकृत संशोधनाचे नदरेन चालना दिवचे कातीर सोदनिबंध फायद्याचो थारतलो, अशेंय अमृत सिंग हांणी सांगलें. ह्या वेळार प्राणीमित्र संघटणेचे सचीव सुनील पळ, रोनील गोसावी, दुर्गेश सिंग हाजीर आशिल्ले.
प्रजातींच्या संशोधनाची खर गरजः केरकार
नानाटी प्रजातीच्या संशोधनाची खर गरज आसा. गोंयच्या रानांनी आनी रानां भायर सोरपांचें वैविध्य सांपडटा. ह्या प्रजातींचें संशोधन आनी मुल्यांकन करपाची विशेश गरज आसा, अशें पर्यावरण अभ्यासक राजेंद्र केरकार हे संबंदांत प्रतिक्रिया दितना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
