भांगरभूंय | प्रतिनिधी
दोगां तरणाट्यांक आक्ताक मरण
भांगरभूंय । प्रतिनिधी
दिवचलः पेठवाडो नानोड्यां व्हॅली मिडोज लागसारच्या ओल्ताचेर मारुती सीआयझॅड आनी दुचाकी हांचो आमकारा- सामकारां जाल्ल्या भिरांकूळ अपघातांत कानोळकारवाडो, नानोडेंचे प्रतीक कानोळकार (22) आनी वरचोवाडो नानोडेंचो लक्ष्मण मळीक (19) हांकां सुवातेचेरूच मरण आयलें, अशी म्हायती दिवचल पुलीस स्टेशना वयल्यान दिल्या.
मारुती सीआरझॅड (जीए 04 1124) ही मोटार दोडामार्गा वयल्यान म्हापशेंचे दिशेन वताली जाल्यार पल्सर मोटरसायकल (जीए 04 पी 5126) अस्नोडेंच्यान नानोडेंचे दिसेन वताली. ह्या दोनूय गाडयां मदीं पेठवाडो नानोडेंच्या व्हॅली मिडोज लागसारच्या वोल्ताचेर अपघात जालो. दोनूय गाडयांचें जाल्लें लुकसाण पळयत जाल्यार अपघात कितलो भिरांकूळ आशिल्लो ताचो अदमास येतालो.
हो अपघात फाटल्यान येवपी दिवचल मतदारसंघाचे आमदार डॉ. चंद्रकांत शेट्ये हांचे नदरेक पडलो. आमदारान तत्काळ अपघात जाल्ल्याची म्हायती 108 आनी दिवचल पुलिशेक दिली. पुलीस तत्काळ घडणुकेचे सुवातेर दाखल जाले.
दिवचल पुलीस स्टेशनाचे उपअधिक्षक सागर एकोस्कार हांच्या मार्गदर्शना खाला पुलीस निरिक्षक दिनेश गडेकार आनी पुलीस उपनिरिक्षक विराज धावस्कार फुडलो तपास करतात. रातीं उसरां अपघाताचो पंचनामो केलो. ह्या अपघातांत नानोडेंच्या तरणाट्यांक मरण आयिल्ल्यान गांवाचेर दुख्खाची सया पातळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
