नात्यांतली गोडसाण

भांगरभूंय | प्रतिनिधी

नात्यांचो हिशोब करपाची गजाल येता तेन्ना नात्यां परस लोकांची गर्दी चड आशिल्ल्यान खूब गोंदळ जाता. नात्यांक स्वास घेवंक दिल्यार तांकां वाडपाक, फुलपाक मदत जातली. खरें सांगूं, नातें मनाक टॉनिक म्हणून काम करता. म्हाका दिसता सगळ्यांक नातें जाय, पूण कांय जाणांक तें कळटा आनी कांय जाणांक कळना. दरेका नात्याक वेगळी सुवात जाय.
नातें सांबाळप हें कुशळटायेचें काम. नातें तिगोवन दवरपाक सगले यत्न करचे पडटात. कारण नात्यां वांगडा जगप अर्थपूर्ण. मजा येता. नात्यांचें गणीत सुटलें जाल्यार मागीर सुख आपोआप निर्माण जाता. एकामेकांच्या आवडी प्रमाण आमी हो संबंद प्राधान्यान आनी उर्बा दिवन सांबाळ्ळो जाल्यार मनाचो कोनसो मुक्तपणान हांसता. फकत थोडे नातें तिगोवन दवरपाक जाय, पूण ते शीतळ आसूंक जाय, एकामेकां कडेन सुख वांटून घेवपा इतलें. काळजा थावन केल्ल्या संवादांत गोडसाण आसूंक जाय.
जिणेंत जायत्यो सोबीत गजाली आसात. सुकणीं, झाडां… द्राक्षांच्यो वेली पळोवपाचो आनंद घेवंक जाय. रस्त्यार चलतना कुशीक नाटक चलता, आमकांय तें पळोवपाची इत्सा आसता, पूण वेळ नासता. स्वता खातीर जगतना तुमचे भोंवतणी चलपी बऱ्या गजालींचो आस्वाद घेवंक मेळपाक जाय. भोंवतणी सदांच भितरल्यान आनी भायल्यान निवळ, सोबीत आनी पारदर्शक मन आशिल्ले लोक आसूंक जाय, अशें दिसता. संपर्कांतल्या दरेका मनशा कडेन तांचे वेव्हार नितळ आनी शुद्ध आसूंक जाय, तांकां मुक्तपणान उलोवपा येवंक जाय, खोशेची भावना आसूंक जाय, सुख आनी दुख्खाच्या वेळार एकामेकांक आदार दिवपा इतली सहकार्याची भावना आसूंक जाय. कितेंय चुकल्यार एकामेकांचे कान घट्ट धरपाचो अधिकारुय आसपाक जाय. एकमेकांचे कान धरचे मेरेन अधिकार आनी मोगाची ओलसाण जाय. मनांत शुद्ध आनी निरपेक्ष नातें आसल्यार कसलोच गैरसमज जावचो ना..
घरांतली घरकान्न घराक खरेच घराचें रूप दिता. नात्याची गोडसाण फकत तांचे हाजिरेंतल्यान तिगून उरता. ताची टू- डू लिस्ट केन्नाच सोंपना. सकाळीं उठून कोयर काडप, आयदनां धुवप, पडदे बदलप, झाडांक उदक दिवप, रांगोळी घालप, देवाची पुजा करप, दिवे पेटोवप, नाश्तो, जेवण, परतून रातीचें जेवण, मदल्या वेळार घर निवळ करप, भुरग्यांनी केल्लो पसारो लावप, व्हडल्या- जाण्ट्यांक सेवा दिवप तशेंच वेळोवेळ बाजारांत वचप, शाळा- कॉलेजीची फी भरप, शाळेची मिटिंग अटेंड करप, दिल्ल्या पयशांनी घर चलोवप, आपल्या दिसपट्ट्या कामांत पयशे सांठोवन दवरून बँकेंत गुंतवणूक करप अशीं कितलींशीच कामां बायलां करीत असतात.
कुटुंबीक कार्यावळींत वा हेर सुवातेर मेळ्ळ्या उपरांत आमकां एकामेकां कडेन उलोवपाक आवडना, पूण पिकनिकेक गेले उपरांत आमी खूब मुक्तपणान गजाली मारूंक शकतात. सुटयेच्या काळांत आमकां सुशेग घेवपाक मेळटा आनी वांगडाच मजा करपाक मेळटा. मागीर अशा वेळार ल्हान- ल्हान भोंवडेची येवजण करून दोनूय हेतू साध्य जातात. कांय लोकां वांगडा तुमी तुमचें भुरगेपण परतून जियेवंक शकतात आनी कांय लोकां कडेन बंधन घट्ट करू शकतात, नवीं जोडूंक शकतात..
सगळ्यांक मुक्तपणान उस्वास घेवपाची इत्सा आसता; तुमच्या प्रिय व्यक्तींक मेळपाक आनी स्वताक ताजें करपाक जाय जाल्यार कुटुंबा सयत भोंवडी केल्यार तुमचे संबंदय तिगून उरतात आनी मन ताजें जाता. तातूंतल्यान नात्याची गोडसाण सहजपणान तिगून उरता. ती लागवड जाता. जायते फावटीं भोंवडी कुटुंबीक संबंद तिगोवन दवरपाक, नात्याची गोडसाण तिगोवपाक आदार करता, अशें जाणवता. कोणाकय पुराय मनान मान दिवप. एकामेकां कडेन वेव्हार करतना समजूत दाखोवप हें नात्यांतली गोडसाण जिवी दवरता. हें सगळें घर म्हणटात तेन्ना येता. घरांत घरपण हाडपाक, सकारात्मकताय तिगोवन दवरपाक नात्यांतली गोडसाण खूब योगदान दिता.

गौरी भालचंद्र
9422373926