भांगरभूंय | प्रतिनिधी
विश्वजीत राणेः मासोड्ड्यां फुटसाल मैदाना खातीर बुन्यादी फातर
भांगरभूंय । प्रतिनिधी
वाळपयः वाळपय मतदारसंघांतल्या लोकांनी आतां मेरेन बरे तरेचो आदार केला. फुडारांत लेगीत असोच आदार दिलो जाल्यार वाळपय पालिका वाठारांत बरे तरेच्यो सुविधा उपलब्ध करतले. नाणून वाठारांत म्हत्वाकांक्षी प्रकल्प उबारतले. तशेंच वाळपय पालिकेचे मालकेच्या मैदानाचेर चालू आशिल्लें मैदानाचें काम निमाण्या पांवड्याचेर पावलां, अशी म्हायती थळावे आमदार तशेंच मंत्री विश्वजीत राणे हांणी दिली.
गोंय राज्य शार विकास प्राधिकरणा वतीन मासोड्डें सत्तरी वाठारांत फुटसाल मैदान उबारतले. ताचो मंत्री राणे हांचे हस्तुकीं हालींच बुन्यादी फातर बसयलो. त्या वेळार ते उलयताले.
ह्या वेळार वाळपयची नगराध्यक्ष सेहझीन शेख, उपनगराध्यक्ष अनील काटकार, थळावी नगरसेविका प्रसन्ना गांवस, नगरसेवक रामदास शिरोडकार, देवस्थानाचे राजेंद्र गांवस, पुंडलीक गांवस, देवस्थानाचे म्हाजन, थळावे नागरीक व्हड संख्येन हाजीर आशिल्ले.
गांवगिऱ्या वाठाराचे उदरगती खातीर वेगवेगळे प्रकल्प चालीक लायतले. मासोड्ड्यां खेळगड्यांक खेळपा खातीर सुसज्ज मैदान नाशिल्लें. ताची विशेश दखल घेवन ह्या वाठारांत फुटसाल मैदान बांदतले. तातूंत फुटबॉल आनी ह्वॉलिबॉल हांचीय सुविधा आसतली, अशें राणे हांणी सांगलें.
वाळपय वाठारांत फुटराल मैदान बांदतले हे खातीर नगराध्यक्ष शेख हांणी समाधान उक्तायलें. थळावी नगरसेविका प्रसन्न गांवस हांणी सांगलें, ह्या वाठारांतल्या तरणाट्यांची अशा मैदानाची मागणी आशिल्ली. मंत्री राणे हांकां लागून ती आतां पुराय जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
