भांगरभूंय | प्रतिनिधी
थळाव्या लोकांचो सहाय्यक अभियंत्याक घेराव
भांगरभूंय । प्रतिनिधी
फोंडें: नाणूस उसगांवां फाटल्या कांय म्हयन्यां सावन लोकांक उदकाची समस्या सतायता. ताका लागून थळाव्या लोकांनी शुक्रारा सकाळीं बांदकाम खात्याचे सहाय्यक अभियंते यशंवत मापारी हांकां घेराव घातलो. नळाक नेमान उदक येना जाल्यार खर आंदोलन करतले, अशी शिटकावणी लोकांनी ह्या वेळार दिली.
थळावे पंच संजय गावडे, विस्मय मडकयकार, रवींद्र गावडे, रोहिदास गावडे आनी हेर थळावे लोक ह्या वेळार हाजीर आशिल्ले.
फाटल्या कांय म्हयन्यां सावन नाणूस, दाग वाठारांतल्या थळाव्या लोकांचे नळ सुकल्यात. ह्या वाठारांत ताकतिकेन सुरळीत उदका पुरवण करपाची मागणी लोकांनी केली. नळ बंद आसून लेगीत उदकाचे बील फारीक करचें पडटा. उदका पुरवण सुरळीत जाली ना जाल्यार खर आंदोलन करतले, अशी शिटकावणी बायलांनी दिली. हे विशीं म्हायती दितना सहाय्यक अभियंते यशवंत मापारी हांणी सांगलें, दाग वाठारांत जी पायपलायन घातल्या ती खूब पोरणी जाल्या. ताका लागून तिका गळटी लागपाची शक्यताय आसा. ह्या वाठारांत घातिल्ल्या उदकाचे पायपलायनीची तपासणी करपाचे कर्मचाऱ्यांक आदेश दिल्यात. उदका पुरवण सुरळीत जाय मेरेन लोकांक टँकरांतल्यान उदका पुरवण करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
