भांगरभूंय | प्रतिनिधी
फोंडें: नाणूस- उसगांवां रस्त्याच्या पोंदा आशिल्ल्या उदकाचे पायपलायनीक गळटी लागल्या. फाटल्या दोन तीन दिसां सावन रस्त्या वयल्यान इल्लें इल्लें उदक झिरपता, पूण अचकीत थंय व्हड झरो फुटू येता, अशी शक्यताय थळाव्या लोकांनी उक्तायल्या.
ह्या वाठारांत आशिल्ले म्हादय न्हंयेंत व्हड प्रमाणांत जिलेटीनाचे स्फोट करून नुस्तेंमारी करतात. ताका लागून उदकाचे पायपलायनीक गळटी लागल्या आसुंये असो दुबाव थळाव्या लोकांनी उक्तायला. तेचवरी स्फोटांक लागून गांजे- उसगांव गांवांतल्या कांय घरांक वेरो गेल्यात. जिलेटीनाचो स्फोट करून नुस्तेमारी करप्यांचेर कारवाय करची, अशी मागणी थळाव्या लोकांनी केल्या.
नाणूसचे देंवतेर फाटल्या दोन तीन दिसां सावन शिंपणावळ खात्याचे उदकाचे पायपलायनीक गळटी लागल्या. ताका लागून दीसरात रस्त्या वयल्या उदक व्हांवता. गांजेचे म्हादय न्हंयेचे उदक शिंपणावळ खात्या वतीन ओपा उदक शुद्धीकरण प्रकल्पाक पुरवण केल्ल्यान प्रकल्पा लागसारच्या उदकाची पातळी नियंत्रणांत उरता. मे म्हयन्यांत म्हादय न्हंयेच्या उदकाची ओपा प्रकल्पाक खूब गरज आसता. फाटल्या म्हयन्यांत गांज्या त्या उदकाचे पायपलायनीचें कनेक्शन सुटिल्ल्यान एक दीस उदका पुरवण बंद आशिल्ली आनी ताचो ओपा प्रकल्पाचेर गंभीर परिणाम जाल्लो. कांय थळाव्या लोकांनी दिल्ले म्हायती प्रमाण गांजे ते नाणूस मेरेन व्हांवपी म्हादय न्हंयेंत व्हड प्रमाणांत जिलेटीनाचे स्फोट करून नुस्तेमारी चल्ल्या. ताका लागून न्हंये पासून लागींच आशिल्ले उदकाचे पायपलायनीक गळटी लागल्या. गांजे गांवांतल्या कांय घरांच्या वण्टींक वेरो गेल्यात. ताका लागून पुलिसांनी ह्या वाठारांत गस्त घालून बेकायदो तरेन नुस्तेमारी करप्यां आड कारवाय करची, अशीय तांणी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
