नाट्य कलेक पिरायेची मर्यादा ना

भांगरभूंय | प्रतिनिधी

रंगनाथ कलशांवकार: हरमलच्या श्रीमूळपुरुष सांतेरी कुळकार देवस्थानाचो वर्धापन दीस उमेदीन

हरमल: नाट्य कलेक पिरायेची मर्यादा नासता. भुरगेपणांत जितली कला आपणायली वता तितलो जाण्टेपणांत तिचो उपेग जाता. उपरांत कलेची खरी वळख घडटा. हरमलच्या ज्येश्ठ नाट्य कलाकारांचो भोवमान आपल्या हातांतल्यान जाता हें आपलें भाग्य आशिल्ल्याचें हरमलचे पंच वांगडी रंगनाथ कलशांवकार हांणी म्हणलें. 

केपकर वाडो, हरमल हांगच्या श्रीमूळपुरुष सांतेरी कुळकार देवस्थानाचो वर्धापनदीस आनी ज्येश्ठ नाट्यकलाकारांच्या भोवमान सुवाळ्याक कलशांवकार उलयताले.

आमची संस्कृताय राखपाची जबाबदारी चडशी ज्येश्ठ नागरिकांचेर निंबून आसता. तांचे कडल्यान जितलो योग्य आनी प्रभावी वापर जातलो तितकी नाट्यकला आनी संस्कृती तिगून उरतली, अशें कलशांवकार हांणी फुडें म्हणलें. सत्कार केल्ल्या मानेस्तांचें नाट्यकलेंतलें काम आनी आजूनय तांचे भितर आशिल्ली उमेद तरणाट्यांक उर्बा दिता. तांच्या मार्गदर्शनान नाट्यकला सासणाची तिगून उरतली. हे देवस्थान समितीन कलाकारांचो भोवमान करून बरें काम केल्ले खातीर तांणी संस्थेची तोखणाय केली आनी परबीं भेटयलीं. 

ह्या सुवाळ्यांत हरमल गांवांतले ज्येश्ठ नाट्य कलाकार रामचंद्र केरकार, आत्माराम कोरकणकार, विठ्ठल नार्वेंकार आनी पत्रकार चंद्रहास दाभोलकार हांचो शाल, श्रीफळ भेटोवन रंगनाथ कलशांवकार हांचे हस्तुकीं भोवमान जालो. ह्या वेळार देवस्थानाचे अध्यक्ष उल्हास केपकार हाजीर आशिल्ले. 

ह्या भोवमानाक जाप दितना पत्रकार चंद्रहास दाभोलकार हांणी देवस्थान समितीन भोवमान घडोवन हाडिल्ले खातीर समितीचे उपकार मानले. समाजांत बरें काम करपी आनी संस्कृती राखपा खातीर योगदान दिवप्यांचो भोवमान करून नव्या कलाकारांक दिका दाखोवपाचें काम तोखणाय करपा सारकेंच. लोकांक एकवटान काम करचें. केपकर घराण्यांतलें डॉक्टर कुटूंब मडगांवां दुयेतींची सेवा करता. हें खरेंच बरें काम. ह्या देवस्थानाच्या दरेका कामाक आपूण सदांच सहकार्य दितलों अशें तांणी सांगलें. 

ह्या वेळार देवस्थानाचे देवेंद्र केपकार, संदेश केपकार आनी हेरांनी मानेस्तांक फुलांचो तुरो भेटोवन येवकार दिलो. कार्यावळीचें सुत्रसंचालन उदेश पेडणेंकार आनी मधू पेडणेंकार हांणी उपकार मानले. उपरांत गायनाची कार्यावळ जाली.