भांगरभूंय | प्रतिनिधी
भारतीय नाट्यशास्त्रांत मोलादीक बदल हाडपी कलाकार
इम्फाल, खबरां संस्था: भारतीय नाटक मळाचेर नवे विचार, नवे प्रयोग आनी सांस्कृतीक परंपरेचे नवे अर्थ लावपी म्हालगडे नाट्य दिग्दर्शक, लेखक रतन थियाम हांकां इम्फाल (मणिपूर) हांगां २३ तारखेक मरण आयलें. तांची पिराय ७७ वर्सां आशिल्ली. तांच्या मरणाक लागून भारतीय रंगमाचये वयल्या तेजस्वी आनी प्रायोगिक युगाचो शेवट जाला.
रतन थियाम हे फकत दिग्दर्शक न्हय, तर कवी, संगीतकार, नेपथ्य आनी उजवाडाचे तज्ञ आशिल्ले. ताणीं आपल्या प्रयोगांतल्यान रंगमाचयेक फकत मनरिजवणेचें माध्यम न्हय, तर वैचारीक आनी आध्यात्मीक संवादाची सुवात केली. भारत सरकारान पद्मश्री (१९८९) आनी संगीत नाट्य अकादमी पुरस्कार (१९८७) ह्या सारक्या जायत्या राश्ट्रीय आनी आंतरराश्ट्रीय भोवमानांनी ताचो भोवमान केलो.
कोरस रेपर्टरी थिएटराची स्थापना
१९७६ वर्सा तांणी ‘कोरस रेपर्टरी थिएटर’ ह्या नांवान एक स्वतंत्र प्रयोगशील रंगमंच इम्फाळाक सुरू केली. हें संस्थान फकत रंगप्रयोग करपी न्हय, एक सांस्कृतीक साधना स्थळ जालां. थियाम हांच्या नेतृत्वा खाला हे संस्थेन ‘चक्रव्यूह’, ‘उरुभंगम’, ‘उत्तरप्रियदर्शी’, ‘अंधा युग’ अशा खुबश्या नाटकांचे प्रयोग केले. जे फकत भारतांतूच न्हय तर पुराय संवसाराचेर गाजले.
एनएसडीचे आदले संचालक
रतन थियाम हांणी दिल्लींत नॅशनल स्कूल ऑफ ड्रामांतल्यान शिक्षण घेतलें आनी मुखार हे संस्थेचे संचालक आनी अध्यक्ष म्हणूनय काम केलेंे. तांच्या काळांत एनएसडीन खुबश्या नव्या दिग्दर्शकांक आनी नट घडयले. तांणी परंपरीक भारतीय नाट्यकलेचो नव्यान सोद घेवपाचो यत्न केलो आनी ‘थिएटर ऑफ रूट्स’ ही चळवळ उबी केली.
मणिपूर आनी ईशान्य भारतांतले नाट्यकलेक राष्ट्रीय आनी संवसारीक पांवड्यार व्हरपाक ताचो मोलादीक वांटो आशिल्लो. खुबश्या कलाकारांक ते फकत गुरू न्हय तर एक प्रेरणा दिवपी स्थान आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
