भांगरभूंय | प्रतिनिधी
कला अकादमीची कोंकणी नाट्य सर्त सोंपली. निकालूय लागलो. मात, आतां ताचे वयल्यान वादाची कीट उसळ्ळ्या. साबार इनामां वांगडाच लेखकाक म्हणल्यार नाट्य संहितेक पुरस्कार दितात. पूण हे खेपे खंयच्याच लेखनाक पयलें इनाम दिवंक ना. दुसरें दिलां. हाचेर हें इनाम मेळिल्ले युगांक नायक हांणी हरकत घेतल्या. निशेध म्हणून आपूण दुसरें इनाम स्विकारचो ना, अशें ते म्हणटात. सोशल मिडियाचेर तांचे पत्रक व्हायरल जालां. हाचेर जायत्या जाणांच्यो प्रतिक्रियाय आयल्यात. फुडलें कांय दीस हो विशय दिसाळीं, सोशल मिडियाचेर गाजतलो. दुबाव ना. मात ह्या मंथनातल्यान कितें तरी शाश्वत, कोंकणीच्या बऱ्याचें भायर सरुं, अशीच अपेक्षा.
सर्त कितलीय बाबत वा दर्जेदार जांव, ती राज्य, देश पांवड्या वयली जावं वा तालुक्या पुरती, पयलें, दुसरें, तिसरें इनाम दिवंक जाय. फाल्यां एकूय नाटक बरें नाशिल्लें म्हणून पयलीं इनामां सोडून फक्त उमेद वाडोवपी इनामां दितले? संवसारीक वस्ताद पंगडा आड सामके बाबत क्रिकेट खेळून मॅच एका धांवड्यान जिखली जाल्यार त्या पंगडाक कुशीक दवरतले? निमाणें जैत म्हत्वाचें. मैदानीं खेळांत स्टिराॅयड घेतिल्ल्या खेळगड्याक बाद थारावन दुसऱ्या क्रमांकाच्या खेळगड्याक भांगरा पदक दिलां. कितलेशेच फावटी. नाट्य सर्तींत पयलो ना जाल्यार दुसऱ्याक पयलें दिवपाचें. बऱ्यांतल्यो बऱ्यो तीन संहिता वेंचून तांकां तीन इनामां दिवपाचीं. चडश्या जाणांचें हेंच मत आसतलें. हाचे पयलीं सगल्या भाशांच्या सर्तींनी पयलें वा केन्नाय दुसरें, तिसरें इनाम ‘कोणाक ना’ अशें जाहीर जालां. जांव ती मागीर कला अकादमीची सर्त वा हेर कोणाचीय. म्हाविद्यालयीन, विद्यालयीन सर्तींनीय हें जालां. कला अकादमीचे नेमावळिंतूच तशें आसा, अशें स्पर्धक म्हणटात. म्हणल्यार परिक्षकांक आवडूंक ना जाल्यार इनाम दिवप ना. हो नेम बदलप शक्य आसा? आतां हो वाद वाडोवचे परस नाट्य संहिता विभागाचो निकाल परत नव्यान जाहीर करपाक मेळटलो? सर्तींतल्या नाटकांच्या लिखाणाचो पांवडो थारावपाक चवथो परिक्षक कित्याक आसचो न्हय?
ह्या वादांत उडकी घेवपी कांय जाणांनी परिक्षकांचेर टिका केल्या. पूण हे परिक्षक नाट्य मळाक तशे अनवळखी नात. सगल्या सर्तींच्या नेमांनी ‘परिक्षकांचो निकाल अंतीम आसतलो’ अशी ओळ आसताच. तेंय मतींत घेवपाक जाय. हाचो अर्थ निकाल चुकीचो लागला अशें जाणकारांक दिसत जाल्यार तांणी निशेध करपाक जायना, अशें न्हय. टिका, निशेध करपाचो सगल्यांक कायद्यान अधिकार आसा. आपल्याचेर अन्याय जाला अशें दिसलें जाल्यार उजू मार्गान प्रत्येकान तो उक्तावंक जाय. युगांक नायक हांचे सारको!
सर्तींतलें एक नाटक इंग्लीश कादंबरी, सिनेमा वयल्यान उखल्लां, अशें थोडे म्हणटात. ते संहितेक पयलें इनाम बी दिवपाचें थारिल्लें, मागीर ऐनवेळार तें रद्द केलें, अशें बी जावंक ना मूं? नाट्य सर्तींत अनुवाद केल्लीं दर्जेदार नाटकां आसपाक जाय, तेच बाराबर स्वतंत्र, थळावे मातयेंतलींय नाटकां जाय. कोंकणी नाट्य सर्तींत चडशीं अनुवादीत नाटकां आसतात, असो आरोप पयलीं जाला. कोंकणी लेखकांनी वर्साक एक तरी कोंकणी नाटक बरयत जाल्यार ही सर्त आनीक फुलतली. एका काळार कोंकणी साहित्यीक, वावुरप्यांनी ही सर्त जिवी दवरिल्ली. एखाद्या सिनेमा, दुसरे भाशेंतले कथे वयल्यान सुचिल्लें, ताचे पसून स्फूर्त घेवन बरयिल्लें नाटक आसूं येता. पूण तसो उल्लेख लेखकान पयलीं करपाक जाय. इतलेंय आसून दुसऱ्या नाटकाचें नेपथ्य आनी हेर गजालींची नक्कल करपी नाटक सांपडलें जाल्यार त्या नाट्य संस्थेचेर आयोजक बंदी घालपाक शकतात, हाचें भान बरोवप्याक आसपाक नाका? परिक्षकांचोय निकाल कोणाच्या तरी चेपणाक लागून पक्षपाती जाता, अशे आरोप हाचे पयलीं जाल्यात. स्पर्धकांकूच चड बरें खबर आसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
