भांगरभूंय | प्रतिनिधी
फोंडें: लोकशायेंत दरेकल्याक उलोवपाचो आनी प्रस्न करपाचो अधिकार आसा. जनतेचे प्रस्न मांडपा खातीरूच लोकशायेंत अधिवेशन संकल्पना निर्माण जाल्या. मात गोंयच्या सरकार विरोधी पक्षांचो तो हक्क काडून घेवपाचो यत्न करता. तशें केल्यार जनतेचे प्रस्न मुखार हाडपाक मेळचे नात. सभापतीनी आमकां प्रस्न मांडपाक योग्य तो वेळ दिवचो. ना जाल्यार गोंयचे समस्त जनते वतीन ‘जनता अधिवेशन’ भरतलें आनी लोकांचे प्रस्न थंय मांडटले. अशी शिटकावणी आमदार विजय सरदेसाय हांणी दिली. फोंड्यां बुधवारा तांणी ‘जनता दरबार’ आयोजीत केल्लो. ह्या वेळार फोंडें आनी धारबांदोडेंच्या लोकांनी आपल्यो विवीध समस्या तांचे मुखार मांडल्यो.
जनता दरबार जाले उपरांत पत्रकारां कडेन उलयतना तांणी म्हाणलें, आयज फोंड्यां तीन मंत्री आसात. तरी लोकांनी आपल्यो समस्या आमकां सांगल्यात. हांगा सगल्यांत चड मंत्री आशिल्ल्यान लोकांक न्याय मेळटालो ही अपेक्षा फटीची थारल्या.
तांणी मुखार म्हणलें, फोंड्यां चोरयांचें प्रमाण वाडलां. घाणयार्या उदकाचीं पायपां जोडपाचो प्रस्न गंभीर जाला. उदकाच्या प्रस्नाक लागून लोक उबगल्यात. पायपांक लागून विवीध समस्या निर्माण जाल्यात. सबजिल्लो हॉस्पिटल आसून नाशिल्ले सारकें आसा. राजीव गांधी कला मंदिराक गळटी लागल्या. आमचो आमदार मंत्री आसल्यारूच उदरगत जाता हें आयज चुकीचें थारलां. फोंडेचे जनतेचे प्रस्न येवपी विधानसभेंत मांडटले. थंय उलोवपाक संद दिवंक ना जाल्यार, वता थंय जनता विधानसभा अधिवेशन आपयतले. ह्या सगल्या राजकारणी लोकांक रिटायर करपाची वेळ आयल्या.
संजीवनी साखर कारखान्याचो विशय घेवन तांणी म्हणलें, संजीवनी साखर कारखान्याचे सुवाते विशीं फुडाराक एक व्हड रियल इस्टेट घोटाळो जातलो. भाऊसायब बांदोडकर हांणी ऊस लागवडी खातीर यत्न केल्ले. जाल्यार हें सरकार ऊस बंद करात म्हणून सांगता. इथेनॉल प्रकल्प हाडपाचो यत्नूय गाजर दाखोवपाचो प्रकार आशिल्ले वरी आयज दिसपाक लागलें. थंय व्हडा प्रमाणांत आशिल्ले जमिनीची योग्य अशी विभागणी करून ती पचोवपाचो सरकार यत्न करता.
फोंडें पुलीसां विशीं उलयतना तांणी म्हणलें, खंयचोय मनीस न्याय म्हागपा खातीर पुलीस स्टेशनाचेर येता तेन्ना संबंदीत पुलीस निरीक्षकांनी तांचें म्हणणें आयकून घेवचें. गुन्यांव नोंद करून घेवचो. तांकां सरळ न्यायालयांत वचात अशें सांगप चुकीचें. ज्या निरीक्षकान अशें सांगलां, ताका हे विशीं योग्य मार्गाने जाब विचारतलों.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
