भांगरभूंय | प्रतिनिधी
भारतीय क्रिकेटीक स्टार खेळगड्यांची देणगी मेळ्ळ्या. एक वता दुसरो येता. गुंडप्पा विश्वनाथ, कपिल देव, सुनील गावस्कर, सचीन तेंडुलकर, सौरभ गांगुली, अनिल कुंबळे, विरेंद्र सेहवाग महेंद्र सिंग धोनी अशें स्टार खेळगडे काळ फुडें वतां तशें निवृत्त जालें. काल-पयर मेरेन भारतीय क्रिकेटीचे खांबे आशिल्ले रोहित शर्मा आनी विराट कोहलीय आतां तेंच वाटेन आसा. पयलीं तांणी टी-20 क्रिकेटींतल्यान आनी आतां टॅस्ट क्रिकेटींतल्यान निवृत्ती जाहीर केली. सध्यातरी ते वन डे खेळटले.
टी-20 वर्ल्ड कप जिखल्या उपरांत नव्या खेळगड्यांक वाट मेकळी करपाक म्हूण दोगांयनी त्या प्रकारांतल्यान निवृत्ती घेतली. तांच्या वांगडाच संवसारीक पांवड्या वयलो अव्वल अश्टतासी खेळगडो रवींद्र जडेजाय टी-20तल्यान कुशीक सरलो. टी-20तल्यान तिगूय गेले म्हूण कोणाक व्हडलेंशे दुख्ख जावंक ना. कित्याक तर तांची सुवात भरून काडपाक तरणाटे खेळगडे तयार आशिल्लेंच. संजू सॅमसन 2.0, आक्रमक अभिषेक शर्मा, जडेजाची कॉपी अक्षर पटेल अशें तिगजाण तयार आशिल्लें. मात, टॅस्ट क्रिकेटींतल्यान रोहित- विराटान निवृत्ती घेतल्या उपरांत खुबशें प्रस्न उबें रावल्यात. मात, तांची सुवात भरपाक जाता, वेगळ्या पद्दतीन.
तशेंय पळोवपाक गेल्यार विराटाचे निवृत्तीन भारताक व्हडलोसो फरक पडचोना. कित्याक तर फाटल्या 5 वर्सांत विराटाची कामगिरी पळयल्यार ताणें 39 मॅचींनी 30चे सरासरीन धांवड्यो काडल्यात. नव्या खेळगड्यान 30चे सरासरीन धांवड्यो काडपाक सुरवात केल्ली जाल्यार 7-8 टॅस्टी खेळून तो घरा बसपाचो. विराट आपल्या आदल्या कामगिरीच्या नेटार इतलो तेंप पंगडांत तिगून उरलो. विराटा खातीर फिटनेस हो केन्नाच प्रस्न नाशिल्लो. फिटनॅसाच्या नेटार तो आनीक 2 -3 वर्सां सहज खेळपाचो. मात, अति क्रिकेटीक लागून तो निवृत्त जालो म्हणूं येता. सचीन तेंडुलकार 40 वर्सां उपरांतूय खेळटालो. तेन्ना टी- 20 क्रिकेट इतल्या मोट्या प्रकारांत खेळनाशिल्लें. तशेंच सचीन आंतरराष्ट्रीय टी-20 प्रकारांतल्यान पयलींच कुशीक सरिल्लो. ताका लागून 2 प्रकारच्या क्रिकेटीक जाय आशिल्ली कुशळटाय तो राखूंक शकलो. विराट – रोहिताचे बाबतींत तशें नाशिल्लें.
विराट आनी रोहित आनीकूय टॅस्ट क्रिकेट खेळपाक सोदताले, अशें कित्याक म्हणटा? तशें नाशिल्लें जा्ल्यार ते रणजी क्रिकेट खेळचेंच नाशिल्लें. फाटल्या कांय दिसांनी मैदाना भायर खुबश्यो घडामोडी जाल्या आसतल्योच. तातूंतच गौतम गंभीर प्रशिक्षक जायत सावन दोगांयचो खेळ सामकोच जायना जालो. दोगूय एका पद्दतीचे क्रिकेट खेळून आयिल्लें. गंभीर नव्या खेळगड्यांक लागपी निकश सगल्यांकूच लावन क्रिकेट फुडल्या पांवड्यार व्हरपाक सोदता, तेन्ना ह्या दोगांयनी इतलो तेंप खेळिल्ल्या प्रकाराक तो मानवंक ना आसतलो. ताचो परिणाम कामगिरीचेरूय जालो, फाटोफाट न्युझिलॅण्ड आनी ऑस्ट्रेलिये आड टॅस्ट माळ व्हगडावन टॅस्ट चँपियनशिपींतल्यान भारत भायर पडलो.
रोहिताची फाटल्या 5 -6 वर्सांची कामगिरी पळयल्यार ओपनर म्हूण ताणें 50च्या सरासरीन धांवड्यो काडल्यात. फाटल्या 8 टॅस्ट मॅचींतल्या कामगिरीचेर आदारून ताका अपेशी बॅट्समॅनाची म्होर लायली. दोगांकूय वेवस्थीत तेंकों मेळिल्लो जाल्यार दोगूय आनीक कांय वर्सां खेळपाचें. दोगांयनी अपेसाचे फाटभुंयेर टॅस्टींतल्यान निवृत्त जावपाचो निर्णय घेतलो, हे एका अर्थान बरेंय आसा. नाजाल्यार इंग्लंडांत परत अपेस आयिल्ले जाल्यार ते क्रिकेट इतिहासांतले शापीत राजकुमार थारपाचें.
धोनीन वन डे क्रिकेटींत नवी ओपनर जोडी तयार करपाचे प्रक्रियेंत सेहवाग आनी गंभीराक भायर दवरलो. सेहवागान हो बदल मानून घेतलो. तशेंच रोहित शर्मा एक बरो ओपनर म्हूण मान्य केलेंय बी. मात, गंभीर खुबश्या मुलाखतींनी आपूण बरो खेळटना भायर दवरलो, अशें उलोवन गेलां. आतां, रोहित- विराट स्वता जावन (खऱ्यानीच?) कुशीक सरल्यात. गंभीर आनी विराटाचे आयपीएलांतलें कॅस्तांव तर फामाद आसा. तेन्ना हांची ट्युनींग कशी जातली, असो प्रस्नूय गंभीर जेन्ना भारताचो प्रशिक्षक जाल्लो तेन्ना उप्रासिल्लो.
आतां वन डे क्रिकेटींत विराट आनी रोहित शर्मा खेळटले. घडये फुडलो वर्ल्ड कप जायसर तरी आसतले. हो वर्ल्ड कप जिखून ते निवृत्त जावपाचो विचार करतात. तांचो खेळ जाता तर तांच्या प्लॅनिंगाक क्रिकेट बोर्डान तेंकों दिवचो. कित्याक तर रोहिताच्या कुशळ फुडारपणा खाला, तशेंच ताणें खासा वेंचिल्ल्या खेळगड्यांच्या नेटार भारतान टी-20 वर्ल्डकप आनी चँपियन्स ट्रॉफी जिखल्या. आनीक एक आयसीसी ट्रॉफी आयिल्ली कोणाक नाका?
अमर पाटील
7507495151
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
