भांगरभूंय | प्रतिनिधी
तेहरान, खबरां संस्थाः इझ्रायलान केल्ल्या हल्ल्यांत फाटल्या २४ वरांत इराणांत १३८ जाणांक मरण आयलां आनी ३५० जखमी जाल्यात. ताका जाप दितना इराणान इझ्रायलाचेर १५० परस चड क्षेपणास्त्रां उडयलीं. तातूंतली स क्षेपणास्त्रां इझ्रायलाची राजधानी तेल अवीवाचेर पडून तीन जाणांक मरण आयलें आनी ९० जाण जखमी जाले. इराणान क्षेपणास्त्र हल्ले करपाचें बंद करूंक ना जाल्यार तेहरानाक लासून उडोवपाची धमकी इझ्रायलाचे संरक्षण मंत्री इझ्रायल काट्स हांणी दिल्या. दोनूय देशां मदल्या संघर्शा उपरांत इझ्रायलाचे प्रधानमंत्री बेंजामिन नेत्यानाहू हांकां सुरक्षीत सुवातेर व्हेला.
भारतीयांक सादूर रावपाचो उलो
इराणा कडेन चालू आशिल्ल्या संघर्शा उपरांत इझ्रायलान देशांतलो सगळ्यांत व्हडलो विमानतळ बेन गुरियन आंतरराष्ट्रीय विमानतळ फुडले सुचोवणे मेरेन बंद केला. इझ्रायलांतल्या भारतीय दूतावासान शेनवारा आपल्या नागरिकांक सादूर रावपाचो सल्लो दिलो. इझ्रायल सरकारान दिल्ल्या सुरक्षा सुचोवण्यां प्रमाण तांकां पाळो दिवपाक सांगलां. नागरिकांनी गरजेच्या कारणां बगर प्रवास करचो न्हय अशेंय सांगलां.
चीन इझ्रायलाचेर तिडकलें
संयुक्त राश्ट्रांत चीनाचे राजदूत फू कांग हांणी इराणाचेर हल्लो केल्ल्यान इझ्रायलाचेर खर तिडक उक्तायल्या. हो हल्लो इराणाच्या सार्वभौमत्वाचें उल्लंघन. इराणाच्या अणुकेंद्रीय सुविधांचेर जाल्ल्या हल्ल्यांक लागून आमी हुस्को करतात. इझ्रायलान परतून आपली मर्यादा हुंपल्या अशें तांणी सांगलें.
अस्तंत देशांक इराणाची शिटकावणी
इराणान जारी केल्ल्या निवेदनांत अस्तंत देशांनी इझ्रायलाक मजत केल्यार तांकां ताचे परिणाम सोंसचे पडटले अशें म्हणलां. अस्तंती देशांनी इझ्रायलाचेर जावपी इराणी हल्लो आडावपाक आदार केलो जाल्यार अमेरिकेचीं जोड संस्थानां, ब्रिटन आनी फ्रांस हांच्या लश्करी सुवातींचेर आनी तांच्या झुजारी बोटींचेर हल्लो जातलो अशी शिटकावणी इराणान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
