भांगरभूंय | प्रतिनिधी
कोंकणी भाशेंत कादंबरी हो प्रकार सामकोच कमी प्रमाणांत येता. हे खातीर कादंबरी बरोवप्याक प्रोत्साहन दिवंक जाय. जेन्नां कोणाक तरी हो स्पार्क आसा म्हण कळटा तेन्नां साहित्या खातीर वावुरतले संस्थेन हें पावल मारूंक जाय. पूण कोंकणी मळार अशें जाल्लें दिसना. सगळ्यांक एकेच तागडेंत मेजप जाता. साश्ट- वेर्णेचो सावियो पिन्टो थोडे काळ आदीं बरोवंक लागला, तरी ताणें पांच कादंबऱ्यो कोंकणी सरस्पतीचे हुंटयेंत घाल्यो. तेवूय जाल्यार स्वताच्या वी.एस.पी. पाब्लिकेशन्सा वतीन. दाद दिवंची पडटली ताच्या धाडसाक. ताची पांचवी कादंबरी आसा ‘नाच बाय नाच’. रोमी लिपिंतली ही आनीक एक वेगळ्या विशयाक धरून उजवाडा आयिल्ली कादंबरी. तिचें मोल 200 रूपया आसा आनी ती पणजेच्या ऍड’स प्रिंटर्सान छापल्या. ही कादंबरी बरोवप्यान आपलो मेवणो हेनरी दा कॉस्ता हाका अर्पण केल्या. फाटल्या कव्हराचेर बरोवप्याची वळख वाचूंक मेळटा.
कादंबरीची कथा
‘नाच बाय नाच’ हे कादंबरीची कथा दोन कुटुंबां भोंवतणी घुंवता, एक क्रिस्तांव आनी दुसरें हिंदू. मोनिका आनी सेल्विन हांच्या मध्यमवर्गीय कुटुंबांत तांचीं दोन भुरगीं आंजेलिका आनी आंजेलो. शेजारी म्हणून दुसरें कुटुंब, शंकर आनी वैशाली. तांचीं दोग भुरगीं शीला आनी संतोश. दोनूय कुटुंबां एकामेकांच्या उत्सवांत सक्रीयपणान वांटो घेतालीं, इतलो तांचे मदीं दाट मोग. तांचीं शाळेंक वचपी भुरगींय खूब मोगान आनी काळजीन वाडिल्लीं.
भुरगीं व्हड जातकच, उंचल्या वर्गांत पावतात तशीं दोनूय कुटुंबांची चिंता आनी काळजी वाडपाक लागता. भुरग्यांची धावेची परिक्षा हो सगळ्यांत व्हडलो हुस्को. मोनिकाक शिकोवपाचो अणभव आशिल्ल्यान ती स्वताचे शैलींत भुरग्यांक ट्युशनाक धाडीनासतना बरें मार्गदर्शन करता. बरे नैतीकते भायर ती आंजेलिकाक घरांतलीं वेगवेगळीं कामां शिकयता, स्वता शिकपाचो आत्मविस्वास रुजयता आनी जिणेचीं मुल्यां शिकयता.
घरांत टी.व्ही आशिल्ल्यान आंजेलिका भितर नाचाची खर आवड निर्माण जाता. ताका योग्य जोडीदार म्हण ताचें शेजारी शीला मेळटा. ताच्या आदाराक लागून आंजेलिका आपली नाचपाची कुशळटाय फ़ाइन ट्यून करपाक येसस्वी जाता. मागीर तीं दोगांय डान्स इंडिया डान्स सर्तींत वांटो घेवंक इत्सूक जातात. ते खातीर खर तयारी करूंक तीं पयलीं आपले शाळेंतूल्याच नाचाच्या वर्गांत वांटो घेतात. करीम नांवाचो एक मुसलमान चलो तांचो नाच शिक्षक जाता.
फावो त्या वेळार करीमाच्या मार्गदर्शना खाला पुराय गोंयांत जावपी वेगवेगळ्या नाचाच्या सर्तींनी आंजेलिका खूब इनामां जिखता. काळा प्रमाण करीम आनी आंजेलिका आपल्या नाचाचे कुशळटायेक लागून नांव आनी नामना मेळयतात. ह्या काळांत आंजेलिका आनी करीमान वेगळें नातें जोडलां अशी सगळ्यां मदें अफवा तयार जाता. आनीक एके व्हडले सर्तींत वांटेकार जांवचे खातीर करीम संयोगान आंजेलिकाच्या घरा येवन ताका आनी शीलाक नाचाचीं कांय जैतीवंत नवीं पावलां शिकयता.
करीम आनी आंजेलिका सराव करपाक लागतात तेन्ना मोनिका तांच्या दर एका पावलाचेर बारीकसाणेन आनी लिपून नदर दवरता आनी नाचतना तीं एकामेकांक कशीं धरतात तें पळेवन स्तब्ध जाता. आपल्या भुरग्याची काळजी चिंतून ती आंजेलिकाक नाचांतल्यान काडून घेता आनी अभ्यासाचेर लक्ष केंद्रीत करूंक सागता. परिक्षेचें निमित्त घेवन आंजेलिकाक नाचाचे सर्तींतल्यान विसव घेवपा पासून दुसरो मार्ग नासता. ताच्या आकांशांचें कितें जाता तर? ताची इश्टीण शीला कितें करता? जिवितांत उतार-चढाव येतकच तें आंजेलिकाक सोडून वता? घट्ट शेजारीँ विस्कळीत जातात? शेवटाक शोकांतिका वा सुखांतिका जाता? कादंबरी वाचून पळेयात.
कादंबरींतल्यो कांय घडामोडी
धावेचे निमाणे परिक्षे आदीं एके तरेचें केरिअर मार्गदर्शन म्हण 8 ते 10 वेच्या विद्यार्थ्यां खातीर शाळा ‘ऑल ऑर नथींग’ हें एक डॉक्युमेंटरी फिल्म दाखयता. तें फिल्म सिस्टर क्लेअर क्रॉकेटाच्या जिविताचेर आदारिल्लें आसता. ह्या फिल्माचो आंजेलिकाचे जिणेंत कितें असर जाता? सिस्टर क्लेअर कशी काम करता, खेळटा आनी त्रासदायक लोकाक कशी आदार करता, तें डान्स करतल्या आंजेलिकाक कितें शिकयता?
एके राती आंजेलिकाच्या न्हिदपाच्या रूमांत वण्टीचेर लटकून आशिल्लो पुर्विल्लो व्हडलो हारसो जो ताच्या शापायन तारवांतल्यान हाडिल्लो तो ताच्या मनाचेर कसलो असर करता? एक दीस आंजेलिकाक अवर लेडी आनी तिच्या एन्जल्स वांगडा सिस्टर क्लेअराचें दर्शन जाता. ताका तांचे वांगडा काम करूंक, उपाशी लोकांक पोसूंक आनी प्रभूची सेवा करूंक आपयतना तिचो क्लॅरियन उलो आयकूंक येता ही सत मानपाची गजाल? ताका दैवीक आपोवण्याचें आमंत्रण आशिल्ले काय? आंजेलिका अचकीत दुयेंत कशें जाता? ताची वागणूक विचित्र कित्याक जाता? ताचे विशीं दोतोराचो सल्लो कितें? तें पिशें जाता काय? हे कादबरींत अशें जायतें लिपिल्लें आसा.
निसरिल्ले संघर्श
कादंबरींत बरोवप्यान संघर्श ताळ्ळ्यात अशें दिसता. पुताक पुलिसांनी धरतकच जो संघर्श जावंक जाय आशिल्लो, तो दिसलो ना. करीम आनी आंजेलिका मदें मोगाचे संबंध जुळ्ळ्यात अशें लोक उलयतात तें आयकले उपरांत आवय- बापायच्यो भावना खडखडून व्यक्त जाल्ल्यो दिसल्यो नात. आंजेलिका एका व्हड इवेन्टांतल्यान भायर सरता थंय ताची भावनीक परिस्थिती प्रस्तूत जाल्ली जाल्यार कादंबरीक उठाव येतलो आशिल्लो. जेन्नां तीन मजली बिल्डिंग कोसळटा थंय घडये चलचित्रांत संघर्श आशिल्लो आसतलो, ताचें चित्रण निसरिल्ल्याचो अभाव जाता. संघर्श हो साहित्याचो मूळ गूण हें लक्षांत आसूंक जाय.
कादंबरींतल्यो देखी
मोनीका एक देखिवंत आवय. भुरग्यांचे गूण फुलचे हे हेतून ती आपले धुवेक नाचांत भाग घेवंक परवानगी दिता पूण नाच शिकोवप्याचो सभाव आनी वागणूक पळेवन धुवे सवें वायट- बरें घडचें न्हय म्हण वेळार धाडशी पावल उभारता आनी आपले धुवेक व्हडले स्पर्धेंतल्यान भायर काडटा.
मुख्यध्यापक भुरग्यांच्या व्हडिलांक आपोवन हाडून ‘ड्राग्सां’ विशीं शिटकावणी दिता आनी भुरग्यांचेर नदर दवरूंक सांगता. काळजी म्हण शाळेच्या चारूय वटांनी सी.सी.टी.व्ही. कॅमॅरा बसयता.
सोंपयतना…
हे कादंबरींतल्यान नैतीकताय दाखयल्या ती म्हणल्यार पालक आपल्या भुरग्यांक आपले आवडी प्रमाण शिकपाक वा करिअर घडोवपाक जबरदस्ती करूंक शकनात, पूण भुरग्यांक फावो तें मार्गदर्शन दिवंक शकतात. भुरग्यांचो फुडार घडोवंक, तांकां कोण जावपाक जाय ते विशीं विचार करपाक मदत आनी मार्गदर्शन करूंक शकतात. आयच्या काळार अश्या मार्गदर्शक साहित्याची गरज आसा. सोंपे भाशेंत वाचकांक ओडून हाडटले कादंबरी खातीर सावियो पिन्टोक परबीं.
– विन्सी क्वाद्रूस,
9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
