भांगरभूंय | प्रतिनिधी
चवथ हो गोंयचे मातयेंतलो उत्सव. चवथीक गांवां गावांनी मातये पसून केल्ली गणपतीची मुर्त पुजपाची पंरपरा आसा. गणपती हो प्रकृतीचें दैवी रूप. भुंयेर कश्टले उपरांत आनी धान्य पिकून तयार जाले उपरांत धादोशी मनान मनयिल्ली अशी ही परब. हेच भुंयेर पिकून तयार जाल्लें ध्यान ‘नव्या’च्या रुपान देवाक कृतज्ञतायेन ओंपपाची रीत चवथी कडेनूच. माटोळी हेवूय ताचीच आनीक एक देख. ही माटोळी रान फळावळांनी सजता.
मंगलमूर्तीक साकारपी जायते गणेशमूर्तीकार गोंयांत आसात. खुब मुर्ती कलाकार परंपरेन फांटली कितलींशींच वर्सा जालीं मुर्तीकलेचे काम करीत आसात. असोच एक गणेश मूर्तीकार म्हणल्यार नागेशीचो पुनित तिळवे. नागेशी गांवांत ताचो घराबो गणेश मुर्ती करपाचें कार्य फाटलीं शंबरेक वर्सा जालीं करता. ताच्या घराण्याक कलेचें दायज परंपरागत गावलां. आज्या, पणज्या उपरांत आयज हे युवा तरणाटे मुर्तीकलेचो वावर सातत्यान करतात. ह्या कार्यान घरच्यांचो मोटो हातभार तांकां लाबता. माती तयार करप ते शेवटाक मुर्ती रंगोवप हीं सगलीं कामां सगले मेळून करतात.
तांची घरकान्न, आवय, भाव, काका- काकी हांचो मुखेलपणान तांकां आदार गावता. सुमारेक130 मुर्ती तांच्या चित्रशाळेंत तयार जातात. नागेशींत कांय घरांनी तांच्योच मुर्ती व्हरतात. रासय गांवांतल्या एका घराण्या खातीर लक्ष्मी पुजनाक लक्ष्मीची मुर्ती तेच करून दितात. लेखी नोंदी प्रमाण आयज शंबर वर्सा पुराय जाल्यांत. हाचे वयल्यानूच तांच्या चित्रशाळेचो इतिहास सामकार येता.
तिळवे हांच्या चित्रशाळेंत जुनाच्या सुरवेक पावसांची सुरवात जाता म्हणंसर गणेशमुर्त करपाच्या कामाक ते सुरवात करतात. गणेशमुर्तीकार त्या नात्यान प्रशासनाचोय मानधनाच्या स्वरूपान तांकां आर्थिक आदार कांय प्रमाणांत गावता. पूण आनीकय मजत कलाकारांक वेगळ्या माध्यमांतल्यान करपाची गरज आसा अशें मत तें उक्तायतात. तिळवे हें आयच्या जगान मुर्तीकार मुखार खुबशी आव्हाना तयार जाल्यात. अशीच आव्हानां तिळवे हांकांय कोविड सारख्या प्रसंगांत सामकार वचचें पडलें. तरीय विघ्नहर्त्यान सगली विघ्ना हरून तांच्या मुर्तकलेत खंड पडपाक दिलो ना. सुरक्षिततायेचे सगलें नेम पाळून तांणी त्या वेळार गणेशमूर्त्यो लोकां मेरेन पावयल्यो. दावताचो प्रमाणीक वावर पुनितबाब तिळवे हांच्या गणेश मुर्ती कलेच्या वावराची नोंद धेवपाच्या हेतांतल्यान जीले हे लिखाण. तांच्या तोखणाय करपी वावरांक लागून तांका एक कलाकार म्हूण नामना गावल्या. ताची आनीक गणेशमूर्त करपाची कला ही आनीक एक वळख जाल्या. तिळवे हें समाजाक आनी खासांकरून तरणाट्यां मुर्तीकलाकाराक आपलो विचार दितना म्हणटात “आज आमी प्लास्टर ऑफ पॅरीसच्यो मुर्ती न्हय तर आमी मातयेच्याच मुर्यांक प्राधान्य दिवंक जाय. जाका लागून सैमीक प्रदूशण जावचेना. आमच्यो तळ्यो, न्हंयो, व्हाळ आनी बांयो नितळ उरतलें. आमी गणपतीक सैमाचो देव म्हूण पुजताना सैमराखण करुंक जाय”. चवथ हो उमेदीचो आनी खोशयेचो उत्सव. सगल्या गणेशमुर्तीकारांक सलाम. तांचे कवतूक करता तितलें उणेंच.
चवथीची सगळ्याक भरभरीत परबीं
पंकज गुरूदास गावडे
नागेशी बांदोडे
फोंडें- गोंय
(7020069891)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
