भांगरभूंय | प्रतिनिधी
अंत्रूज महाल ही देवांची भूंय. फोंडे म्हालांत जायतीं देवळां आसात. बानोडे गांवांतलें श्री नागेशचें देवूळ खूब पैलीचें आनी स्वयंभु आसा. ह्या देवळांत वर्सभर जायते धर्मीक उत्सव आनी सण मनयतात.
अशा उत्सवाचें खाशेलें आकर्षण म्हणल्यार कार्तिक म्हयन्यांत जावपी टोक्याचीं जात्रा. हे जात्रेची सुरवात कार्तिक शुद्ध दशमीक जाता. ह्या दिसा श्रीमहालक्ष्मीची पालखी नागेशी येता. अशे म्हटात की देवी महालक्ष्मी ही पार्वतीचें रूप जावन आसा. चातुर्मास सोंपिल्ल्या कारणान चार म्हयने निदिल्ल्या श्रीलक्ष्मी नारायणाक ती उठोपाक येता अशें आमी ल्हान आसतना म्हणटाले. जात्रेच्या दरदिसा राती श्रीनागेश देवाची पालखी आसता. देवळांत दिवाळी दिसा सुरु जाल्या दीपराधनेचें खाशेलें आकर्शण रातीं पळोपाक मेळटा. लाकडाच्यो चौकटी करून तांकां पितळेच्यो पणट्यो लायतात आनी त्यो सद्दां रातीं आरतीच्या वेळार पेटयतात. ही आरास खूप सोबीत दिसता. आमची पोरणी संकृताय आमकां उदक म्हणल्यार देव अशें सांगता म्हणून जात्रेकडे श्रीनागेश देवाची पालखी देवळा मुखार आशिल्ले तळयेर येता आनी उदकाची पूजा करता. ताका गंगापूजन विधी अशें म्हणटात.
कार्तिक पुनव जात्रेचो मुख्य दीस कार्तिक शुद्ध प्रतिपदा. हे दिसा गावणें गांवांतलो टोक्याचो भार नागेशी येता. ताचें आकर्शण म्हणल्यार एका लांब कोंड्याचे बडयेक रुप्याचीं कडीं लायतात. मुखार श्रीपूर्वाचारी देवाची प्रतिमा आसता. कोड्याक तांबड्या रंगाची गुडी आसता. गावणेंच्यान हो श्रीपूर्वाचारी देवाचो भार गांवांतल्यान वाजत गाजत येता तेन्ना ही गुडी आडवी आसता आनी बराबर कितले शें लोक अनवाणी पायांनी चलत येतात. येतना वाटेर लोकांक भार कौल दिता. नागेशीच्या वाठारांत आशिल्ल्या श्रीकालभैरव देवळा कडेन पावतकुच गुरूदास नागेशकार हे भाराक फुलांचो हार घालून भोवमान करतात. मागीर श्रींपूर्वाचारी देवाच्या भाराची गुडी उबी करतात आनी श्रीनागेश देवळाच्या प्राकारांत येतकूच श्रीपूर्वाचारी आनी श्रीनागेशाची भेट जाता. ही आगळी वेगळी भेट पळोपाक लोकांची गर्दी आसता. मागीर देवळात आरती जाता आनी श्रीनागेशाची पालखी रथा कडेन वता. देवाची उत्सव मूर्ती रथात बसयतकूच वाजत रथ श्रीमहालक्ष्मी देवळा कडेन येता. हे सुवातेर दिवजां जातात. देवळाच्या वाठारांत फेरी भरता.
हे जात्रेच्या निमतांन देवळात तिनूय देवां कडेन केळीच्या गाब्यांची पूजा बांधतात. जात्रेच्या वेळार राती देवाचे तळेर पणट्यांची आरास करतात. हो देखावो पळोवपाक अविस्मरणीय आसता. मन खोशी जाता. श्रीमहालक्ष्मी देवळा कडेन सकाळीं रथ पावतकच श्रीनागेशाची उत्सव मूर्ती वाठारांतल्या श्रीदेव कराडोच्या देवळेंत दवरतात. सांजच्या वेळार परत रथ नागेशी येता. श्रीकालभैरव देवळा कडेन आशिल्ल्या मळार रथ नाचयतात तेन्ना फोग लायतात.
कार्तिक शुद्ध चतुर्थी दिसा दनपरा वनभोजन जाले काय जात्रेची सांगता जाता.
– किशोर वासुदेव वझे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
