भांगरभूंय | प्रतिनिधी
सुरक्षा रक्षकाचो कान कापलो, जाण्ट्या जोडप्याक बांदून दवरलें
नागाळी- दोनापावला रावपी नामनेचे उद्देजक जयप्रकाश धेंपे (७७) आनी तांची घरकान्न पद्मिनी (७१) हांकां खाटीक बांदून तिगांनी शेनवारा मध्यानरातीं दरोडो घालो. भांगराच्या वस्तीं सयत कोट्यांनी रुपयांचो ऐवज ना जाल्ल्याचें दिसून आयलां. मजगती, सुरक्षा रक्षकाक मारपेट करून ताचो कान कापिल्ल्याची खबरुय मुखार आयल्या.
रातच्या १२ ते फांतोडेर ४ मजगतीं ही घडणूक घडली. सुरक्षा रक्षकाक बडोवन दरोडेखोर घराच्या वाठारांत भितर घुसले. जयप्रकाश हांणी दार उक्तें केलें. ह्या वेळार घरांत ते आनी घरकान्न आशिल्ली. दरोडेखोर तांकां बेडरुमात घेवन गेले आनी तांकां खाटीक बांदलें. मागीर घरांतलें सामान घेवन ते पळ्ळे. ह्या वेळार सुरक्षा रक्षक खंय आशिल्लो, ताकाय बांदून घाल्लो काय, ताचो सोद पुलीस घेतात.
सकाळीं घरांत काम करपी वावराडी पावली तेन्ना ही घडणूक उक्ताडार आयली. तिणें दोगांय जाण्ट्यांची सुटका करून पुलिसांक घडणुकेची म्हायती दिली. पणजी पुलिसांनी गुन्यांव नोंद करून तपास सुरू केला. सीसीटीव्ही फुटेज तपास, फिंगरप्रिंट आनी हेर धागेदोरे मेळोवपाचें काम पुलीस करतात, अशी म्हायती उत्तर गोंय पुलीस अधिक्षक अक्षत कौशल करतात. रोखडीच आरोपींक अटक जातली, अशें पुलीस उपमहानिरीक्षक वर्षा शर्मा हांणी सांगलें.
बातमी अपडेट जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
