भांगरभूंय | प्रतिनिधी
म्हापशें: नागव्यां वीज उपकेंद्रा कुशीक मोटारीचो धपको बसून वीज खांबो आनी ट्रान्सफॉर्मराचें लुकसाण जालें. ही सुवात अपघात प्रवण जाल्ल्यान स्पिडब्रेकर घालपा खातीर हडफडें नागवें पंचायतीन जिल्होधिकाऱ्यांक प्रस्ताव धाडिल्लो. हाची कार्यवाही जावंक नाशिल्ल्यान हो रस्तो अपघातग्रस्त जाला.
ही घडणूक सोमारा 26 वेर फांतोडेर घडली. अपघातग्रस्त मोटार चालकाचें मोटारी वेलें नियंत्रण गेलें आनी मोटारीन वीज ट्रान्सफॉर्मर आशिल्ल्या खांब्याक धपको दिलो. हाका लागून हो वीज खांबो मिटर बॉक्सा सयत मोडलो आनी ट्रान्सफॉर्मराक धोको निर्माण जाला.
सकाळीं वीज खात्यान ह्या मोडिल्ल्या वीज खांब्याचें दुरुस्तीचें काम हातांत घेतलें. सांजवेळा उसरां मेरेन हें काम सुरू आशिल्लें. ताका लागून दीसभर डायसवाडो तशेंच आशिकुशीच्या वाड्यार वीज नाशिल्ल्यान हाल जाले.
मजगतीं, फाटल्या 2 नोव्हेंबराक हेच सुवातेर वीज केबलाच्या रिळाक मोटारीचो धपको बशिल्लो. तशेंच हे सुवातेर रस्त्यार ल्हानशें वॉल्त आसा. ह्या वॉल्ताचो अदमास वाहन चालकांक येना. हाका लागून अपघातग्रस्त सुवातेर सेगीत अपघात घडटात.
फाटल्या जून 2024 त जाल्ल्या हडफडें-नागवें पंचायत मंडळाचे बसकेंत अपघातांची दखल घेवन सदर सुवातेर स्पिडब्रेकर घालपाचो थाराव घेतिल्लो. हे विशींचो प्रस्ताव जुलय 2024 त जिल्होधिकाऱ्यांक पंचायतीन धाडिल्लो आनी ताकतिकेन संबंदीत खात्या वतीन स्पिडब्रेकर उबारपाची विनंती केल्ली. पूण अजून हाची कार्यवाही जाल्ली ना.
नागवें वीज उपकेंद्रा कुशीक सेगीत अपघात घडत आशिल्ल्यान स्पिडब्रेकर उबारपाचो थारावन घेवन उपजिल्होधिकाऱ्यांक धाडिल्लो. स्पिडब्रेकर उबारले उपरांत अपघाताक आळो बसतलो अशी आशा आसा.
– रोशन रेडकार, सरपंच
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
