भांगरभूंय | प्रतिनिधी
-गोंय कोंकणी अकादेमी मनयतली खाशेली कार्यावळ पणजीः हार्तस इंदिकस मलबारीकस ह्या वनस्पतीशास्त्रा संबंधाच्या ग्रंथांत लॅटीन, अरबी,
मल्याळम ह्या भासा वांगडाच कोंकणी भाशेंत नागरी लिपिंतल्यान वखदी वनस्पतीची
म्हायती दिवन निशाणी केल्ल्या प्रमाणपत्राक 350 वर्सां पुराय जातात. ते निमतान
तिगां कोंकणी वैजांची आनी प्रमाणपत्राची तसबीर गोंय कोंकणी अकादेमीच्या वास्तूंत
प्रदर्शीत करपाची कार्यावळ अकादेमीन आयोजित केल्या.
रंगा भट, विनायक पंडीत आनी ओपू भट ह्या तिगां कोंकणी वैजांनी 20 एप्रील 1675
ह्या दिसा दिल्लें हें प्रमाणपत्र म्हटल्यार देशी भासांतल्या ब्लॉक छापणावळीचो पयलो
नमुनो अशें जाणकार सांगतात.
मलबार केरळांतले त्या काळांतले डच गवर्नर हेन्रिक वेन रीड हांच्या प्रेरणेन 1669 वर्सा
सुरु जाल्ल्या ह्या वावरांत मलबार वाठारांतल्या सुमार 742 वनस्पतींचें सचित्र रेखांकन
करून चार भासांतल्यान दिल्ली म्हायती ह्या 12 खंडांतल्या ग्रंथांनी मेळटा.
ह्या वावरांत तिगां कोंकणी भाशीक वैजांचें म्हत्वाचें योगदान आसलें आनी आपल्या
प्रमाणपत्रांत ताणीं ह्या वावरा विशीं सविस्तर गवाय दिल्या.
पोरणावळ शास्त्राचे नदरेन हे गजालीक भोव म्हत्व आशिल्ल्यान तिगांय वैजांच्या आनी
प्रमाणपत्राच्या तसबिरीचें अनावरण पोरणावळ खात्याचे संचालक रोहीत कदम हांचे
हस्तुकीं करपाचें अकादेमीन थारायलां. संचार भवन, पाटो-प्लाझा पणजी हांगाचे
अकादेमीचे कचेरींत ही कार्यावळ सोमार ता. 21 एप्रील दिसा दनपरां 3.30 वरांचेर जातली.
सगळ्या कोंकणी मोगीनी हे कार्यावळीक हाजीर रावचें असो उलो अकादेमीचे प्रभारी
अध्यक्ष वसंत भगवंत सावंत आनी सचीव पराग नगर्सेकार हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
