नागरीक पत्रकारां वयली जापसालदारकी

भांगरभूंय | प्रतिनिधी

एखादें उतर नेगार गेल्यार समाजांत अशांतताय पातळूं येता, समाजमन खुबळूं येता आनी उच्चार स्वातंत्र्याचो फायदो घेवन जें कितें उलयलां, तें बुमरँगूय जावं येता.

सोशल मिडिया प्रत्येकाच्या हातांत पावल्या. फेसबूक, ट्विटर, इन्स्टाग्राम, व्हाॅट्सअॅप…. तांचो वापर नेमको कसो करचो हें खबर नाशिल्ले पसून 3- 4 हजार इश्ट जमोवन लायक, शॅर करतना दिसतात. ह्या सोशल मिडियाचो फायदो जाला तशेंच लुकसाणूय. अर्थांत समाजाचें. पूण, सोशल मिडियान जायते नागरीक पत्रकारूय (सिटीझन जर्नलिस्ट) दिल्यात. तातूंतले कांय जाण बिगर सरकारी संघटणा चलयतात, थोडे म्हायती हक्क कार्यकर्ते म्हूण वावुरतात. थोडे खाजगी न्यायदानाचें काम पसून करतात.
मुख्यमंत्र्यान हालींच कांय चळवळे (म्हणल्यार नागरीक पत्रकार!) वावुरपी उदरगतीच्या प्रकल्पांक विरोधा खातीर विरोध करतात, असो शीण उक्तायिल्लो. अर्थांत तांचे नदरे मुखार कांय विशिश्ट वावुरपी आसतले. तांणी मुख्यमंत्र्यांचें उलोवप मनाचेर घेवपाक जाय. प्रकल्पाक लागून समाजाचें कितलें लुकसाण जातलें ताची पुराव्यां सयत म्हायती लोकांक दिवंक जाय. प्रकल्प समाज उपेगी आसल्यार ताचो फायदो कितें जातलो, ताचीय म्हायती पुराव्यां सयत दिवंक जाय. चळवळे, नागरीक पत्रकार वा समाजवावुरपी आसलो म्हूण विरोधांतूच उलोवपाक जाय अशें कांय ना. उदरगतीच्या प्रकल्पा विशीं बरें सांगलें म्हूण लोक नांवां दवरचे नात. सरकाराची तळी उखलता, अशें चार लोक म्हणटले. पूण ताचे कडेन आडनदर करून बरें ताका बरें आनी वायट ताका वायट म्हणपाचें धाडस नागरीक पत्रकारांनी दवरपाक जाय, हें कोणूय मान्य करतलो.
सोशल मिडियाचेर उलोवन लोकांक जागृत करप, म्हायती दिवप, अन्यायाक वाचा फोडप, लोकांच्या बऱ्या खातीर कोणूय कितें करता जाल्यार तें सोभेमाजार हाडप हें तशें पुण्याचेंच काम. मात तें करतना बरी भाशा वापरूंक जाय. पयल्या दर्जाची नासली तरी दुसऱ्या दर्जाची तरी ती आसची. कोणाच्या न्हेसणाक हात घालपी, अहंकार बुचकळिल्ली, आयकुप्याक लज दिसपा सारकी भास सोशल मिडिया वयल्या नागरीक पत्रकारांनी वापरप बरें दिसना. कोणाचीच धर्मीक, भाशीक, संस्कृतीक वा हेर कसलीय भावना दुखोवपाचो अधिकार आमकां संविधान दिना. कायद्यान तो गुन्यांव. व्यक्ती आनी विचार स्वातंत्र्य आसा म्हूण एके- 47 सारकें धडाधड उलोवप धोक्याचें थारूं येता. हें मतींत दवरून प्रत्येकान उलयल्यार बरें. नागरीक पत्रकारांनीय दरेक उतर साणीर बरें घासून पारखुचें आनी मागिरूच तोंडांतल्यान भायर सोडचें. एकदा सोडिल्लो बाण आनी उतर परत घेवपाक मेळना. मुखार कॅमेरो आसा म्हूण भुल्लुसून वचपाक नागरीक पत्रकार म्हणल्यार राजकी फुडारी न्हय. उलोवपान सोशल मिडिया वयले लोक प्रभावीत जावंक जाय. नाजाल्यार नागरीक पत्रकार हो फक्त एंटरटेनर (मनोरंजन करपी) थारतलो. मागीर टायमपास म्हूण लोक हो टाॅक शो पळयतले, ताळयो मारतले आनी पोस्ट मुखार धुकलून आनीक कितें मेळटा काय म्हूण सोदतले.
पत्रकारान बातमी बरयतना तातूंत आपलीं मतां दिसचीं नात, हाची जतनाय घेवंक जाय अशें पत्रकारिता शास्त्र सांगता. मतां मांडटलो जाल्यार नांवान लेख बरोवपाचो. नागरीक पत्रकारांनी आपलें मत मांडटना न्यायदानाचें काम करपाक जायना, अशें म्हणटात. तें काम करपाक संविधानान साबार तरांच्या न्यायालयांची वेवस्था केल्या. लवाद नेमल्यात. वकील आसात. कांय गांवांनी बुदवंत हें काम करतात. कोण चूक, कोण बरोबर हें कायद्याक थारावंदी. अशील, वादी, प्रतिवादी हीं उतरां तांचे खातीर केल्यांत, नागरीक पत्रकारां खातीर न्हय. तांणी जरूर एखादो विशय हातांत घेवचो, अन्याय जाल्ल्यांक न्याय मेळोवन दिवपाचो यत्नूय करचो. पूण, हें करतना पुलीस, न्यायालय आनी हेर सरकारी यंत्रणांचो आदार घेवचो…. आनी म्हत्वाची गजाल, हो विशय मांडटना वयर म्हणलां तशीं उतरां मेजून, मापून वापरचीं. नाजाल्यार न्याय दिवपाचे उमेदीन नागरीक पत्रकाराच्या तोंडांतल्यान एखादें उतर नेगार गेल्यार समाजांत अशांतताय पातळूं येता, समाजमन खुबळूं येता आनी उच्चार स्वातंत्र्याचो फायदो घेवन जें कितें उलयलां, तें बुमरँगूय जावं येता.
गोंयांत जायते बिगर सरकारी संस्था चलोवपी वावुरपी, म्हायती हक्क कार्यकर्ते आसात. तांणी गोंयच्या हिताचें काम केलां. पर्यावरण जतनाय, अन्न भेसळ विरोध, रस्तो येरादारी, बायलां अत्याचार, घुंवळे वखदां, सोऱ्याचें वेसन सोडोवपी…. कितलेशेच वावुरपी, संस्था, संघटणा आसात. हातूंतले सगलेच सोशल मिडियाचेर नागरीक पत्रकार म्हूण दिसनात. तरीय तांचें योगदान उणें म्हणपाचें धाडस कोणाकूच जावचें ना. तांचे भशेन सगलेच नागरीक पत्रकार आमचें सुंदर, सोबीत गोंय वयर काडपाक पारदर्शकतायेन वावुरतले, समाज एकवटीत दवरपाक नितळ मनान घाम गळयतले अशी आस्त बाळगुपाक हरकत ना. ही तांची समाजीक जापसालदारकी न्हय??