भांगरभूंय | प्रतिनिधी
त्येक नागरिकाक सुखान जगपाचें, गिरेस्त जावपाचें सपन पळोवपाचो अधिकार आसा. ते खातीर धडपड करपाक बरेच लोक म्हानगरांनी, विकसीत देशांनी वचून रावतात. खास करून अमेरिकेंत. थंय रोजगार, भलायकी, शिक्षणाच्यो उंचेल्यो सुविधा आसात. म्हणटकच अमेरिकेक वचून स्थायीक जावपाची इत्सा बऱ्याच लोकांक आसता. गरीब वा अस्थिरताय आशिल्ल्या देशांतले लोक कायदेशीर वा बेकायदेशीर मार्गान नोकरी, वेवसाया खातीर अमेरिकेक वतात. थंय भुरग्यांक जल्माक घालतात. मागीर जल्मसिद्ध म्हणटात तशें नागरिकत्व भुरग्यांक मेळटा. ते निमतान पालकांकूय कायदेशीर पद्दतीन अमेरिकेक रावपाक मेळटा. हे पद्दतीक बर्थ टुरिझम म्हणटात. ती फाटलीं देडशें वर्सां सावन आसा. भारता पुरतें पळोवपाचें जाल्यार 16 लाखां वयर भारतीय भुरग्यांक जल्मान अमेरिकन नागरिकत्व मेळ्ळां. मात, आतां ग्रीन कार्डाची वाट पळोवपी लोकांचे आशेर उदक पडटलें. कारण, नवे अध्यक्ष डोनाल्ड ट्रम्प हांणी जल्मसिद्ध नागरिकत्वाचो अधिकार सोंपोवपाचो निर्णय घेतला.
ट्रम्प हांच्या ह्या निर्णयाक लागून स्थलांतरितांच्या भुरग्यांक अमेरिकेंत जल्मल्लो म्हूण नागरिकत्व मेळपाची शक्यताय ना. हो कायदो 20 फेब्रुवारी सावन लागू जातलो. ताचे पयलीं कोण जल्माक येता तो सुटलो. (हाकाच लागून आठ, णव म्हयन्यांच्यो गुरवारी 19 फेब्रुवारी पयलीं सिझेरियन पद्दतीन भुरग्यांक जल्माक घालपाक सोदतात.) कांय लोकांक मोबायल फोनाचें वेसन लागलां, तशें थोड्यांक अमेरिकेक वचपाचे, थंयचें नागरिकत्व मेळोवन कायमचें थंय रावपाचे दुवाळे पयलीं सावन लागल्यात. अमेरिका, कॅनडा, ब्रिटन हांगां वचपाक कांय भारतीय अक्षरशा पिशे जाल्ले पळोवंक मेळटात. तांच्या सपनांचो ट्रम्पान चुरो केलो. ह्या आदेशाक लागून दरवर्सा देड लाखां वयर नवजात भुरग्यांचें नागरिकत्व धोक्यांत येतलें. पयरूच 22 राज्यांच्या अॅटर्नी जनरलांनी हाचे आड याचिका दाखल करून हो आदेश रद्द करपाची मागणी केल्या. अध्यक्ष सोडाच, संसदेक (काँग्रेस) पसून संविधान दुरुस्ती करपाचो अधिकार ना, असो तांचो दावो. अमेरिकेंत बेकायदेशीर स्थलांतरीत आसा. फाटल्या दोन दिसांनी 308 जाणांक अटक केल्या. अर्थांत तांचेर गुन्यांवकारी आरोप आसात. थंय रावपी 18 हजार बेकायदेशीर भारतीयांक भायर काडटले, अशें आमचे परराष्ट्रमंत्री जयशंकर हांणी म्हणलां. ते विशींची भासाभासूय तांणी अमेरिकन प्रशासना कडेन सुरू केल्या.
हो जल्मसिद्ध नागरिकत्वाचो अधिकार काडपाचो आदेश जाला, तरी एच- 1 बी व्हिसा मात कायम दवरल्यात. कारण, ताकाच लागून अमेरिका महासत्ता जाल्या हें अध्यक्ष ट्रम्प हांकां बेसबरें खबर आसा. अमेरिकेक प्रतिभेची गरज आसा. आमकां फक्त अभियंते नाकात तर बरे वेवसायिकूय (दोतोर, वकील, आयटी तज्ञ) जाय, अशें तांणी सोपूत सुवाळ्या वेळार म्हणिल्लें. पोरूं 2 लाख 80 हजार एच- 1 बी व्हिसा दिल्ले, तातूंतले 2 लाख भारतीयांक! दर 10 व्हिसांतले 7 व्हिसा भारतीयांक मेळटात. ताचे फाटोफाट चीन, कॅनडा आनी द. कोरियेचो क्रमांक लागता. विशेश तंत्रीक कुशळटाय आशिल्ल्या व्यक्तिंकूच हो व्हिसा दितात. ताका लागून अमेरिकन कंपनी भारत आनी चीना सारक्या देशांतल्यान शेंकड्यांनी कामगार, अधिकारी हाडटात. तांकां हेरांच्या मानान पगार उणो आसता. तीन वर्सांनी तो व्हिसा नव्यान करपाचो. तो करूंक ना वा जर तुमकां कंपनीन वच म्हूण सांगलें जाल्यार मायदेशांत परत वचपाचें. देखून अमेरिकेंतूच रावपाक मेळूंक जाय, नागरिकत्व मेळूंक जाय म्हूण हो व्हिसा मेळिल्ले, शक्य जाता तितलें बरें आनी खूब काम करतात. मात, आतां नागरिकत्व मेळचें ना आनी अमेरिकन फर्स्ट धोरणाक लागून व्हिसा आडूय बोवाळ जावपाक सुरवात जाल्या. हातूंत विरोधक आसातूच, पूण ट्रम्प समर्थकूय आसात. ह्या व्हिसाक लागून विदेशी लोकांक नोकऱ्यो मेळटल्यो आनी पिळग्यान पिळग्यो अमेरिकेक रावपी आमच्या लोकांक बेकार रावचें पडटलें, अशें तांचें मत. तर सरकारांतल्या कांय मंत्र्यांच्या मतान, अमेरिकेक अर्थीक नदरेन बळिश्ट, महासत्ता करपाची आसल्यार भायल्यांक आपोवचेंच पडटलें. संवसारांतले पयल्या पांच, धा क्रमांकाचेर कुशळ लोक आमी अमेरिकेंत हाडपाक सोदतात!!
नागरिकत्व हो म्हजो जल्मसिद्ध अधिकार अशें आतां अमेरिकेंत तरी म्हणपाक मेळचें ना. अमेरिकेक कुशळ मनशा वांगडा ताच्या घरांतले हेर लोकूय वतात, तांकां आतां थंय वतना अडचणी येवं येतात. नागरिकत्व मेळपाची गजाल तर पयसूच उरली. णव वर्सां पसून व्हिसाचेर थंय लोक रावतात. जो मेरेन ट्रम्प हो निर्णय बदलिनात वा न्यायालयां तो आडयनात जाल्यार ह्या सगल्याच लोकांचें वर्सान वर्स पळयिल्लें सुखी जिविताचें सपन सुरू जावचे पयलींच भंगतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
